Everton-in Allan lalut dawn

Premier League club Everton chuan Napoli midfielder Allan lalut turin Italian club hi inremna an neihpui a, pound maktaduai 25-in an lalut thei ang. 

Everton boss Carlo Ancelotti-a'n midfield thuam ṭhat a duh avangin midfielder ṭha a zawng a, Napoli-a enkawl laia a lo hriat chian tawh Allan lam hi a hawi nghal chat. Kum 29 mi midfielder hi Atletico Madrid pawhin an lalut duh nia sawi a ni a, mahse Napoli lama a pu hlui hnung zui thlangin Premier League lamah kan hmu dawn a ni. 

Everton hian Real Madrid forward James Rodriguez chu lakluh tumin an dawr bawk a, Zinedine Zidane-a hnuaia tla tlum lo player hi he thuziak i chhiar meuh chuan an inrempui tawh hial ang. Ancelotti hian Rodriguez hi Real Madrid leh Bayern Munich-ah pawh a lo enkawl tawh a, kum 29 mi Colombian forward hian a pu hlui zawm turin harsatna a neih a rinawm loh. 

Italian coach hian Danish midfielder Pierre-Emile Hojbjerg pawh a lo dawr tawh a, mahse Southampton midfielder hian Tottenham Hotspur lam pan a thlang. Everton hian Watford-in pound maktaduai 30 an chhiar Abdoulaye Doucoure chu lakluh tumin an hel mek bawk a, Ancelotti enkawl team hian season tharah chuan 'Big Six' lu an ti hai tham viau tura ngaih a ni.