Spurs-in Doherty an lalut

Tottenham Hotspur chuan Premier League lama an elpui Wolverhampton Wanderers aṭangin defender Matt Doherty an lalut a, a man zat tarlan ni lo mah se pound maktaduai 15 niin khawthlang media-te chuan an tarlang. 

Kum 28 mi right back hian kum li chhung atan contract a ziak a, Wolves hi kum 2010 khan Irish club Bohemians aṭanga zawmin match 300 chuang a khelhsak hman a ni - Bohemians-ah hian first team tan a inlan hman lo. 

Republic of Ireland international chuan, "Club lian tak ka zawm thei hi ka lawm takzet. Khawvela stadium ṭha ber an nei a, training ground ṭha ber pawl an nei bawk. Spurs-in min duh tih ka hriat khan ngaihtuahna sen buai a ngai lo," tiin Spurs a zawm thei chu a lawm thu a sawi. 

Doherty hian season hman zawh takah khan Wolves tan inelna hrang hrangah match 50 khelin defender ni mah se goal sarih a khung thei a, 2018-19 season khan league match 38-ah a inlan kim vek - inelna hrang hrangah match 45 khelin goal riat a khung a ni. 

Wolves aṭanga a professional career ṭantu defender chuan, "Wolves-a ka hun hman kha a hlimawm takzet a, he club ṭhat lohna lai reng reng hi sawi tur ka hre lo. Mahse, he hmuna lokal hi ka career atana hmasawnna turin a pawimawhin ka hre si a ni," a ti a, Spurs a zawm chhan a sawi.