Barca damna Suarez Spain-ah Real aiin Barca an lian zawk
Pathianni zan khan khawvelin a nghahhleh El Clasico hmuhnawm a hmu a, Barcelona chuan an hmelma leh elpui ber Real Madrid chu 2-1 in an hneh.
El Classico hnuhnung 18-ah goal luh loh ṭum a awm lo a, goal an thun bakah an chhuah ve ve ziah a ni.
Nou Camp-a inkhelah Real tan an thiampuipa Cristiano Ronaldo bawk a ropui leh a, Barca tan Luis Suarez hi damna tham a ni tih kan hmu nawn leh bawk.
Inkhel chu
Barcelona-in inkhel bul an ṭan fuh, ball an chang tam nghal. Mahse khawvel player manto ber Gareth Bale an veng hneh lo nghal pawt, minute sarihna lekah Karim Benzema tan ball a siamsak a, French striker hian Barca goal dinglam sirah a thun nghal teuh hle.
Hemi hnu hian Ronaldo kan hmu zui nghal a, six yard box aṭangin goal kham a pet per dawp. Real hi goal bawh na mah se goal erawh an thun nghal mai lo.
Barca an inthing harh a, an nawr let zui nghal. Lionel Messi hmangin goal hlauhawm an nei zui ve nghal a, minute 19-naah Jeremy Mathieu chuan Messi hnen aṭanga a ball hmuh ṭha tak chu Real goal-ah a tauh lut.
Suarez leh Neymar ten Iker Casillas an chhaih buai zawm zat. Mahse hmun awl siam sak chi loh tak Ronaldo-a'n hmun awl a hmuh phah ve thung. Portugal forward minute 31-ah Benzema siamsak chu mawi tak maiin an si phurh sut nan Barca goal-ah a khung.
Real an hlauhawm chhunzawm, Luka Modric chuan a khung teuh hle. Ronaldo leh Bale te hlauhawm thei hle, mahse Barca goalkeeper Claudio Bravo a chesual duh tlat lo. First half-ah goal a lut tawh lo, 1-1 in chawlhlawk an hmang.
Inkhel an ṭan leh a, Benzema chuan Bravo-a tan hna hautak a siamsak zui nghal a. Barca bawkin goal an khung thung. Brazilian defender Dani Alves through ball fing tak chu Suarez-a'n minute 55-naah rang takin Barca ṭum hnih hmahruaina goal a khung.
Chungnung zawk nih inchuhin midfield-ah an inbei tawn a, ropui zawk an awm thei bik lo. Barca tan Neymar leh Messi ten half chance an hmu a, mahse goal-ah an chantir zo lo. Benzema chuan box pawn aṭangin ball hlauhawm takin a pet a mah se Bravo-a'n ropui takin a lo dang hlauh.
Hamrik hnuhnung a rik thlengin goal dang a lut tawh lo a Barca-in 2-1 in Real an hneh a, La Liga-ah point 68 hmuin Real aiin point liin an sang ta a ni.
Eng nge an sawi?
Barca boss Luis Enrique chuan, "Kan duh leh beisei result kan nei hi kan lawm hle. Hmhruaitu ni mah ila kan la inthlahdah thiang lo, point hloh thei reng kan la ni. Chakna goal khung tu Suarez kha a ropui a ni. Khatiang goal khung thei kha khawvelah tlemte chauh an awm a, chung zingah chuan Suarez kha a tel, chu chu kan lakluh chhan pawh a ni reng a ni. Goal khung tur bika piang bik a ni tih a lang chiang hle." tiin Uruguayan chu a fak hle.
Real boss Carlo Ancelotti chuan, "A tir lam darkar khat chhung kha chu kan khel ṭha zual hle, mahse kan hun ṭha kan chhawr tawh lo a ni. Team ṭha tak pahnih kan inkhel a, a tawpah a vanduai zawkah kan ṭang kha a pawi hle. Tunah hian champion tuma inelna hi ala tawp lo a, chak lo zawk ni mah ila kan khelh ṭhat em avangin inrintawkna kan hloh tur a ni lo, a tawp thlengin kan bei zel ang," tiin nomawi inchuhna chu a la tawp loh thu a sawi.