Juve-in hmahruaina sawhnghet

Italian Serie A cham­pion lai Juventus-in lea­gue-a an hmahruaina an sawhnghet zel a, an khingpui Genoa chu Pathianni zan khan 1-0 in an hneh, table-a pahnihna AS Roma pawhin an khingpui Cesena chu 1-0 in an hneh ve bawk.

Midfielder Paul Pogba tel lo a khel Juve tan kum 31-a upa Carlos Tevez a khel ṭha chhunzawm zel a, Genoa nen an inkhelh ṭum minute 25-naah goal awmchhun a khung.

Tevez hian tun sea­son-ah Juve tan inelna hrang hrangah goal 24 thun tawhin a team-te point 14 zetin League-ah hma a hruai fal pui tawh. A zawna vawi thum champion tawh Juventus-in vawi li champion an hnaih zel.

Pahnihna Roma-in match nga chhung chak hmel an hmuh loh hnuah khual mualah Cesena chu minute 41-naa Daniele De Rossi goal thun hmangin an hneh a, Juve nen an inkar zau lutuk tur an hum ve hram zel.

Match 10 khelh tur la awmah lehpelh theih chu la ni mah se Juve lehthal tur chuan Roma chet fuh leh Juve chetsual a ngai tawh.

Pathumna Lazio pawhin season tharah Champions League khelh ngei an tum a ni tih lan tirin Felipe Anderson leh Antonio Candreva goal khat ve ve thun hmangin Verona chu 2-0 in an hneh bawk.

Inter Milan manager Roberto Mancini a la che fuh hleithei lo. A zawnin match li chhung chak result an nei tawh lo. Pathianni zan khan Sampdoria-in minute 65-naa an striker Eder Citadin Martins goal hamngin Mancini leh a naute Stadio Comunale-ah an tlawm.

Inkhel dangah Napoli leh Atalanta te 1-1 in an inhnehtawk a, Sampdoria tan chanchin lawmawm a ni.

Sampdoria hian Napoli lehpelin table-ah palinaah an invawrh chho a, season thara tan Champions League khelh an tum ve zel, pathumna Lazio nen an inthlauhna chu point li chauh a ni.