Indian Wells champion Djokovic leh Halep

World number 1 Novak Djo­kovic chuan Roger Federer chu BNP Paribas Open final-ah harsa takin a hneh a, a career-a title 50-na chiah a niin Indian Wells bikah ṭum li a champion-na a ni. Hmeichhe inelnaah Simona Halep a champion ve bawk.

Pathianni zan khan Serbian Djokovic hian Swiss Federer chu 6-3, 6-7 (5-7), 6-2 in a hneh hram. Mipa final inkhelah hian set khatna chu harsa vak loin DJokovic hian a la nghal mai a, set hnih naah Federer chuan a tawnhriat ngah tawh chhawng ṭangkaiin 6-7 (5-7) in set a la ve leh. Set thumnaah Serbian hi chesual nawn duh tawh loin 6-2 in a la let ve leh a ni.

Grand slam title ṭum riat lai la tawh kum27-a upa Djokovic chuan, "Ka thawhrim rah chu a takin ka tel ve mek zel a, ka champion thei hi ka lawm takzet. Thil hote anga lang pawh hi ka tan chuan a awlsam bik lo a, kei leh ka team-te hian theihtawp kan chhuah tak meuh ṭhin. Season bul ṭha taka ka ṭan thei hi ka lawm a, kumin chhung zawngin inrintawkna min pek zel ka beisei," tiin a sawi.

Khawvela grand slam chawi hnem ber, ṭum 17 zet chawi tawh­tu Federer chuan, "Novak hi ka lawmpui hle, tournament ropui taka a khelh bakah final-ah inkhel ropui tak min hmachhawn tir theih avangin player ṭha tak a ni tih a chiang, a khelh ṭhat zawk avangin chak zawk nih a phu a ni. Ka tan pawh season bul ṭanna ṭha tak a ni ve tho mai," tiin a sawi.

Hmeichhe final-ah world number 3 Simona Halep chuan World number one Jelena Jankovic chu set khat a hloh hnuah lehthal lehin a hneh bawk.

Kum 30-a upa Jankovic-i'n awlsam taka set khatna 2-6 a alak avang hian Halep hi chak lo tura rin a ni hman. Mahse set hnihna aṭangin a khel ṭha ṭan a, nasa taka an inbeih hnuin 7-5 in a chhuhsak thei hram. Final setah erawh harsa lutuk loin 6-4 in a la chhunzawm thei a ni.

Jankovic chuan, "Simona kha khel ṭha takzet a, ka tluk lo hle. A naupan zawk avangin thahrui a ngah bakah a thiam em avangin chak a phu a, a cham­pion hi ka lawmpui," tiin a sawi.

Halep chuan, "Ka tam chuan final ropui tak a ni a, ka chak hi ka lawm a. Ka hun tawn tawhah chuan ka champion-na liam ber ala nih avangin ka theihnghilh tawh ngai dawn lo," tiin a sawi.