Bayern an tlawm, Robben a inhliam

Bayern Munich-in thla 11 hnua an khelmuala an tlawm hmasak ber ṭum an tawng. Pathianni zan khan goalkeeper Manuel Neuer chetsual vangin Borussia Monchengladbach lakah 2-0 in an tlawm.

Allianz Arena-a inkhelah Bayern Munich-in inkhel thunun zawk mah se a pawimawh ber goal an khung theih loh an tuar. Vawi 16 zet goal-ah an pet a, a goal lo. Bayern lawm lohna belhchhah turin an player pawimawh Arjen Robben chu hliam vangin lakchhuah a ni.

Dutch winger Robben hian inkhel ṭan aṭanga mi­nute 24 naah a dul ti hrawlah hliam a tawrh vangin lak­chhuah a ni.

Bayern-in ball an chang tam a, an khel a hmuhnawm hle. Amaherawchu minute 30-naah Monchengladbach-in Brazilian striker Raffael chuan goal hmahruai a khung. Neuer-a'n a hna a thawk ṭha tawk lo.

Second half-ah a danglam chuang lo. Inkhel thununtu Bayern an ni a, goal khungtu erawh Monchengladbach lam bawk an ni. Minute 77-naah Neuer-a'n first half-a a ngam loh Raffael bawk a ngam lo a, goal a chhuah leh. An khelmualah 2-0 in Bayern an tlawm ta a ni.

Inkhel chhehvel

Bayern tan Champions League semifinal April 2014-a Real Madrid an hneh loh hnua an khelmuala an tlawm leh hmasak ber a ni. Bundesliga-a champion tur erawhin Bayern dinhmun a la ṭha tho a, anmahni hnaih ber tu Wolfsburg-in an khingpui Mainz an draw vangin point 10 laiin hma an la hruai fal a ni.

Hliam vanga zawnchhuah ngai Robben hian Bayern game neih leh tur hmasa ber April 2 a Borussia Dortmund an khelh hunah a khel thei dawn lo. FC Porto nen Champions League quarter final first leg April 15-a an khelh turah a khelh theih dawn leh dawn loh a chiang lo bawk. Robben hi Bayern player pawimawh ber pawl a ni mek a, vawi 28 inlan tawhah goal 19 a khung thei a ni.

Eng nge an sawi?

Bayern Munich manager Pep Guardiola chuan a keeper khel fuh tawk lo Neuer chhanin , "Manuel tihsual vanga chak lo kan ni lo. Kan tlar hmate'n an hna an thawh ṭhat tawk loh vanga chak lo zawk kan ni a, dem tur an awm a nih chuan goal thun harsat kan tlar hmate hi dem tur chu an ni. Bundesliga a nih vangin kan game hi awlsam turah miin an ngai ṭhin. Mahse, chutiang chu a nih loh zia zanin khan kan hmu. International break te han hmang phawt ila, kan lo kir leh hunah chuan chak result nen kan hun kan hmang thei leh tawh ang," a ti.

Bayern keeper khel chhia Manuel Neuer chuan, "Gladbach khan an khel ṭhain tlar hnung kha an in rem phui fuh em em a, chance awmze nei kan insiam hleithei lo a ni. Kan chak lohna hian min ti hnual tur a ni lo, kan tumah hian kan chiang reng tur a ni," a ti.