Tlak hlauhawmah QPR an ding

Queen Park Rangers-in relegation zone chhuahsan an tumna kawngah an la hlawhtling thei rih lo a, an khelmualah khel ṭha zawk nichungin Everton lakah 1-2 in an tlawm.

Loftus Road-a inkhelah hian Everton tan minute 18 na lekah Seamus Coleman chuan goal hma­hruai a khung a, QPR tan minute 65-naah Eduardo Vargas chuan a sut. Mahse, Tottenham aṭanga loan a Merseyside club zawmtu Aaron Lennon a rawn in lar a, a club thar tana a goal hmasa ber rawn khungin 2-1 in Everton a rawn chakpui ta a ni.

Everton tan kum 2015-a away-a an chak vawi hnihna a nih laiin QPR erawh an manager Chris Ramsey hnuaiah an khelmual Loftus Road-ah chak hmel an la hmu lo a, Premier League table tawp ber dawttu an ni mek.

QPR manager Chris Ramsey chuan, "Khel ṭha tak chunga point thum kan hlawhchhuak thei lo kha kan vanduai hlein ka hria. Ka player te'n an theihtawp chhuahin an khel ṭha takzet a, tuna kan khelh dan anga kan khelh reng theih chuan season tawpah kan him ka ring tlat a ni," a ti.

Everton manager Roberto Martinez chuan, "Kan rilru put­hmang leh chak duhna thinlung kan neih khan minti lawm takzet a ni. QPR kha an vanduai ka ti a, chak thei dinhmunah an rawn din hnuin kan tlar hnung phui ṭhat vang leh goal ropui tak pahnih kan thun khan min chakpui ta a ni," a ti.