United Europe ticket sihhmuhtu Gerrard

Anfield-ah goal mawi, red card, penalty hlah hmuh tur a awm. Steven Gerrard-a'n second half-ah captain armband nen field a rawn rap a, mawl vangin second 38 hnuah hnawchhuah a ni. Pathianni zanah Manchester United-in Liverpool 2-1 in an hneh a, palina dinhmun an sawhnghet.

Chak phu United

Anfield-ah Liverpool aiin Manchester United-in bul an ṭan fuh a; midfield-ah Marouane Fellaini a thawkrim a, Belgian midfielder hian a pumraw lenna a hmang ṭangkai hle.

Minute 14-naah Fellaini aṭanga ball chhuak chu Ander Herrera-a'n a hnampui Juan Mata tan ball fing a pe lut a, Spanish midfielder hi Liverpool keeper Simon Mignolet hmaah a buai lo a, a ke dinglamin kil takah a khung.

Inkhel boruak a san avangin pass sual a tam a, game mawi hmuh tur a tam lo. Darkar chanve pelh hretah ding lam aṭangin captain Jordan Hen­derson-a'n ball duhthu­sam a vawrh lut a, Daniel Sturridge-a'n amah ang lo takin goal-ah pet nghal loin Adam Lallana tan a pe let a, Lallana hian goal zawnah a pet lo.

First half-ah United-in hmahruai an phu a, Liverpool game fuh lo siam ṭha turin Lallana aiah captain armband nen Gerrard a rawn lut.

Boruak sangah Gerrard-a'n rawlthar rilru a la pu reng a, Mata a tlawh nghal fua a. Herrera-a'n Liverpool captain hi tlawh ve lehin a fuh lo a, Gerrard hian en liam mai loa a rah zui avangin hnawhchhuah a ni.

Minute 55-naah Louis van Gaal-a'n goal thun belh tumin Angel di Maria a luh tir a, Argentine winger hian minute li hnuah Mata awm awl hmu fuhin pass fuh tawk lo mah se Spanish midfielder hian mawi mang khengin a pet lut tho. Scissor kick-a Mata goal hi United supporter-te'n an theihgnilh phal tawh lo ang.

Player 10-a khel Liverpool-in tlawm an hreh a, minute 69-naah David de Gea chet fuh tawk loh vangin Daniel Sturrige-a'n Liverpool tan a khung . Goal khat hian inkhel a tinung thar a, goal chance awm tam lo mah se inkhel tawp thlengin a hmuhnawm. Injury time-ah Daley Blind-a'n German de­fender Emre Can lakah penalty a hlawhchhuak a, Rooney-a'n goal zawnah pet mah se Keeper Migno­let-a'n a dang ṭha hle.

Sawi zui hlawh

Kum 2015-ah Liver­pool a vawi khatna atan Premier League-ah an chak lo. Gerrard-a red card-in sawi zui a hlawh a, captain chhuah hnu lawkah United defender Phil Jones-a'n Liverpool midfielder Henderson a thal tawp a, yellow card chauh a chawi avangin mualneitu supporter an thinrim hle.

Substitute Mario Balo­telli-a'n insum theihna a la tla chham zel, yellow card a hmuh hnuah card vawi hnihna chawi thei dinhmunah a ding a, Italian forward hi Liverpool ṭantute khap daih a ngai hial.

Hun tawp hma hretin Liverpool defender Martin Skrtel-a'n United keeper De Gea a rap lui a, referee-in a hmuh hmaih.

Van Gaal a lawm

Manchester United manager Louis van Gaal chuan, "Tunah chuan team angin kan khel tawh a, first half-ah khan kan khel ṭha lehzual. Liverpool hi team ṭha tak an ni a, an thiamna chu pressure pek a ni. An ṭhatna hmangin an khelmualah kan hneh a ni," tiin a sawi.

Dutch manager chuan sawi zelin, "Second half-ah erawh tam zawk mah ila pressure pe ve lo an awm a, kan khelh dan hmang kan hloh phah a, Liverpool an chet ṭhat phah bawk. Chutihrualin a pawimawh ber point thum kan hlawhchhuak a, kan lawm hle a ni," a ti.

Goal khungtu Mata fak zuiin, "United ka enkawl tirh aṭangin Mata hi ṭha ka ti ta a, a khelhna hmun tur ka zawng a, tun­ah chuan ka hmu tawh e. Goal hnih hnih a khung a, goal ropui tak ve ve a ni," tiin Spanish midfielder chungchang a sawi.

Penalty hlahtu United captain Rooney chuan, "Kan supporter-te thawm a ṭha a, Juan Mata goal kha a ropui a ni. Penalty kha pet tir zawk ila a ṭha tur," tiin a sawi.

Anfield-ah Rooney a che ṭha lo a, Mata kha penalty kian se chuan Chelsea midfielder hlui kha hattrick siam thei dinhmunah a ding.