Ngaihdam diltu Gerrard

Liverpool captain Steven Gerrard chuan Pathianni zana Man­chester United nen an inkhelh ṭuma red card a hmuh avangin a teammate-te leh supporter-te chungah ngaihdam a dil.

Liverpool-in an hmel­ma United an hneh loh ṭum hian Gerrard hi second half-ah lutin second 38 hnuah hnawchhuah a ni.

Red card chawitu Steven Gerrard chuan, "Referee thutlukna kha a dik a, ka pawm a ṭul a ni. Ka teammate-te leh fan-te ka ti beidawng a, ka thiam loh a ni. Khatia ka chet chhan kha ka hrethiam bik lo," tiin an chak lohnaa mawhphurtu a nih thu a sawi.

Gerrard chuan, "Sawi belh zel a rem tawh lo, heilai hmuna ka rawn kal chhan chu supporter leh fan-te chunga ngaihdam dil turin a ni," tiin media a hmachhawn chhan a sawi.

Liverpool manager Brendan Rodgers chuan, "Steven khan first half kha a en a, tackle kan ngah tawk lo a, team khelh danah khan a hrilhhai deuh a ni mahna. Second half-ah inkhel ti thlak danglam tura luh tir a ni a, a beisei angin field chhungah a awm bik lo. Captain ṭha tak a ni a, ngaihdam a dil a, kan pawm thlap," tiin a sawi.

Liverpool captain hi red card vangin match thum a khel thei dawn lo. Liverpool captain hian FA Cup quarterfinal replay-ah Blackburn a hmachhawn thei dawn lo a, Premier League-a Arsenal leh Newcastle an khelh hunah a inlan thei lo bawk ang.

Gerrard hian Liver­pool a chhuahsan dawn tih January thlaa a puan khan season tawp thlenga a theihna zawng zawnga a khelh tur thu asawi. Kum kua leka upa a nihin Liverpool hi a zawm a, 1998 khan club tan a inlan ṭan a, 2005-ah Champions League nomawi a chawi pui bakah inelna lian tham pakuaah a champion pui bawk.

Gerrard hian record ṭha tak nei mah se Liver­pool hi Premier League title a lak pui lo. Season liam ta khan champion thei dinhmunah Liverpool hi an ding a, Chelsea nena an inkhelh ṭuma Gerrard-a tawlh tluk vangin an champion lo. Tun ṭuma Gerrard-a red card vang hian sea­son thara Liverpool Champions League khelh­na chance a ti chhe hle.