Chelsea-in hma an hruai zel

Champions League aṭanga hnawh­chhuah Chelsea-in Premier League-ah champion an hnaih zel. Pathianni zan khan 3-2 in Hull City an hneh a, point ruk laiin hma an hruai fal ta.

Hull khelmual KC Stadium-a inkhelah Chelsea tan Diego Costa chuan Premier League-a a goal 19 na a khung a, Eden Hazard leh Loic Remy te'n goal khat ve ve an khung bawk.

Inkhel ṭan tir lamah Chelsea an hlauhawm nghal a, goal pawh an khung hma. Belgian winger duhawm Hazard chuan minute hnihna lekah goal a rawn khung nghal a, hei hi Diego Costa chuan minute 9-na lekah a rawn chhunzawm ve lehnghal.

Awlsam takin Chelsea an chak mai dawn emaw tih hnuah Hull City an khel ṭha zawk a, Egyptian winger Ahmed Elmohamady chuan minute 26 naah goal khat a rawn sut a, Hull City fans authawm a reh hmain striker Abel Hernandez chuan minute 28-naah a rawn khung belh leh a, an khelmualah Hull fans an sapatal.

Chelsea hmatawng manto rual aiin Hull City an hlauhawm zawk a, Chelsea tlar hnung an rum ṭhaih ngun hle. Thibaut Courtois chuan vawi thum lai goal ngei tura ngaih ṭha zetin a dang a, Chelsea chhanhim-tu a ni.

Mourinho-a'n Loic Remy a luh tir fuh a, QPR striker hlui hian minute 77 naah a ball khawih hmasak ber chu goal-ah a chantir nghal a, 3-2 in Chelsea-in hnehna an chang ta a ni.

Hull City-in an khel ṭha takzet a, Chelsea goal-ah vawi 19 petin, goal zawnah vawi riat an pet a, goal hnih chiah an khung thung. Chelsea-in goal shot nei tlem mah se, an goal shot a thlawnin a thamral lo. Vawi riat Hull goal-ah petin vawi thum chiah goal zawnah an pet a, goal zawn a an pet erawh a goal vek thung.

Eng nge an sawi?

Hull City manager Steve Bruce chuan, "Kan khelh dan enin chak kan phu a, Chelsea-te ang team ṭha tuma goal shot vawi 19 vel zet nei thei kan nih chuan kan khel ṭha thawkhat hle tihna a ni. Kan phu ang point kan hlawhchhuah loh avangin kan vanduai takzet a ni," a ti.

Chelsea manager Jose Mourinho chuan, "Point ruk laia hma hruai fal tawh chungin game khatin team dang aiin kan khel tlem a, champion turin kan dinhmun hi a ṭha tawh hle, kan champion leh champion loh hi chu kan kutah a innghat tawh a ni," tiin champion tura an dinhmun a ṭhat tawh thu a sawi.