Liverpool-in United inkhelh an zirtir

Manchester United ṭantute chuan Old Trafford chu 'Theatre of Dreams' (Duhaisam ennawm petu) tiin an sawi ṭhin a, a aia hmun nuam zawk khawvelah awmin an hre lo - mahse, an duhaisam thlenna hmun nia an ngaih hi mangchhia an tawnna hmun a chang mek.

Pathianni zan khan Premier League inkhelah United hian Liverpool an mikhual a, 3-0 in an tlawm. Reds tan Luis Diaz chuan goal hnih khungin, Mohamed Salah chuan goal khat a thawh ve bawk a, United inkhelh an zirtir.

Coach thar Arne Slot hnuaiah Liverpool-in league match thum khelin an la chak vek a, point kua an hmu der. United erawh match thum an khelhah vawi khat chiah an la chak avangin point thum an nei a, season ṭantir aṭangin champion a hla nghal ringawt!

Old Trafford-a inkhel entu 73,738-a a tam zawk chu Manchester United ṭantu an ni a, mahse, away fans ṭhutnaa Liverpool fans tlemte aiin an thawm a zawi zawk - ngam loh val an tawng a, season ṭantir aṭangin an mei a khup nghal.

United an reh

Season tawp rualin Erik ten Hag chhuak tur anga sawi thawm ring tak a awm a, mahse, Red Devils neitu thar Sir Jim Ratcliffe leh a thawhpuiten Dutch coach thlaktu tur duhthusam an hmuh loh avangin Ten Hag-a chunga rinna nghah an thlang.

Ten Hag hian contract thar a ziah hnu lawkah, "Ka kalna apiangah nomawi ka chawi ṭhin," a ti a, FA Cup champion hlim an nih miau avangin hnial theih a ni lo - Pathianni zana an khelh dan erawh kalna apianga champion ṭhin coach hnuaia khelh dan tur a ni lo!

Minute 35-naah Liverpool-in goal hmahruai an khung a, Casemiro ball pek sual aṭanga kal zel chu Mohamed Salah-a'n Diaz tan a siamsak a, Colombian forward hian goal-ah chiang zetin a tauh lut.

Diaz hian a duhtawk mai lo. Ngaihngam taka chawlhlawk hman a nih theih nan minute 42-naah a khung belh leh a, hei pawh Casemiro tihsual bawk a ni a, Salah siamsak bawk a ni - Real Madrid-a midfielder hmuhnawm Casemiro hian United-ah a thiam a theihnghilh em ni chu aw, tih mai tur a ni.

Hmelma nunrawng!

United player-ten Salah an ngam lo a, chawlhlawk hman zawhah pawh thawnthu a danglam chuang lo. Egyptian forward bawk hi Red Devils player-te tan a hnawksak chhunzawm a, an chelh meuh lo a ni ber mai.

Minute 56-naah Dominik Szoboszlai-a siamsak chu Salah hian a duhnaah tak dahin, goal-ah a lo chantir a, chak tur a chiang tawh tiin a sawi theih. Salah hian United a hmachhawn vawi 15-ah goal 12 ngawt a khung ta a, a ngam rem rem hle.

Liverpool hi an vanneih zan ni se, goal tam zawk khung thei an ni. First half-a Trent Alexander-Arnold goal khung chu offside vangin pawmsak a ni lo a, Salah-a'n goal a khung hnuah uiawm taka chance hlah a nei a, Szoboszlai-a'n duh aiin thutlukna a siam har hret ṭhin bawk.

A tawpah chuan 3-0 in Liverpool an chak a, a hmuna inkhel entu, United-a share nei thar Sir Jim Ratcliffe chuan lu dawm meuhin inkhel a thlir - result a ṭhat loh reng chuan British sumdawng hausa hian coach thlak a hreh lo ang.