Ka hun tawp a hnai - Salah

Liverpool fan-ten United an sawp avangin lawm hla an sa a, mahse, an inkhelh zawha an thiampuipa Mohamed Salah thusawi erawh hriat a nuam lo ang - Egyptian forward hian Merseyside club-a a kum tawp ber a hman tawh thu a sawi.

Kum 32 mi forward chuan, "Zanin kan inkhel tur kha, 'Old Trafford-a ka match hnuhnung ber tur a ni tawh mai thei asin' ti chungin ka khel a ni. Ka contract chungchangah club-in min la dawr lo a, chuvang chuan ka season tawpna ber ka hmang mekah ka ngai," a ti.

Salah hian July 2022 khan Liverpool-ah kum thum dang cham turin contract a ziak a, kar khatah £350,000 hlawh mekin, Reds chanchinah ani aia player hlawh hnem an la awm lo. Mahse, season tawp rual hian a contract a zo tawh dawn a, a thusawi hi contract thar zawrh tura Liverpool a nawrna a ni ve thei bawk.

Egyptian forward chuan, "Nuam taka inkhelh zel ka duh a, nakkumah enge thleng chu kan hria ang chu," a ti a, Reds manager Arne Slot chuan, "Tun dinhmunah chuan, 'Ta se...' tia sawi a tam rih. Kan player a ni a, ani ang player kan nei hi ka lawm a, a khel ṭha takzet bawk.

"Player-te contract chungchang hi ka sawi ve vak ngai lo a, a khelh ṭhatzia inhriat duh erawh chuan darkar tam ka sawi thei ang," a ti. Salah hi nikum September khan Al Ittihad chuan pound maktaduai 150-a lak an tum a, Reds-in an hnar.

Egypt international Salah hian Liverpool tan match 352 khel tawhin goal 214 a khungsak a, assist vawi 92 a nei bawk. Nomawi chawi theih zawng zawng Liverpool tan chawi tawhin, season kal mekah match thum khela goal thum khungin, assist vawi thum a nei der tawh.