Marquez hun a thleng ve leh ta!

Sulhnu ropui leh ṭha leh ropui tak tak awm sa te a rawn khum vek dawn emawni tih laiin Marc Marquez a inhliam a, vung taka a kal lai chu a chawl deuh reng, tunah erawh a thiamna a la theihnghilh lo a ni tih kan hmu leh ta.

Spanish rider hian Pathianni zan tir lama tlan zawh tak Aragon MotoGP-ah hnehna a chang a, bike intlansiakna sang leh ngaihhlut berah hian kum thum ngawt chak ni hmel a hmuh loh hnuah a chak ve leh ta a ni.

Marquez-a'n hnehna a chan hnuhnung chu kum 2021 kha niin, a chak lehna tawng turin a nghak rei hle - a ban ruh vawi tam tak zai a ni a, hliam na tak a neih avangin ngai a awh leh thei mai lo.

Repsol Honda nen pawh an thawhdunna an ti tawp hial a, tunah chuan a thiam leh theihna te kha a lo bo vek bik lo tih a takin kan hmu a, amah hnaih bertu Jorge Martin aiin second nga deuhthawin a thleng hma zawk.

Rider championship lamah Martin chuan hma a la hruai chhunzawm zel thung a, Ducati rider hian amah hnaih bertu Francesco Bagnaia aiin point 23-in hma a la hruai fal, dinhmun him tak erawh a ni bik lo.

September 8, Pathianni hian Misano World Circuit Marco Simoncelli-ah San Marino Grand Prix an tlan chhunzawm lehnghal ang.