US Open quarterfinal-ah Zverev a lut

Alexander Zverev chuan a vawi khat nan Grand Slam nomawi chawi ngei a tum a, kawng dik a zawh mek zel - nimin zing khan Brandon Nakashima hnehin a vawi li nan US Open quarterfinal a lut.

Louis Armstrong Stadium-a inkhelah Zverev hian set hloh hmasa zuk mah se 3-6, 6-1, 6-2, 6-2 in a tho chhuak a, a match lehpekah chuan tualchhung tlangval Taylor Fritz nen an inhmachhawn leh dawn a ni.

Kum 27 mi Zverev chuan, "Match tir lamah khan keimah ka inveng nasa lutuk a, khami khan Brandon-a'n rawn hmang ṭangkaiin min nawr bet a, set hnihna aṭang kha chuan ka khelh dan phung ka thlak danglam ta zawk," a ti.

German tlangval Zverev hian Grand Slam dawta inelna ngaihhlut dang chu a la kim thawkhat tawh. Masters 1000, ATP Finals leh Olympic champion pawh a ni tawh, mahse major title a la vuak chhuah loh avangin a ropui tur angin a la ropui tawk lo.

Tun inelna neih laiih Novak Djokovic leh Carlos Alcaraz te an tla tawh - Zverev tan kawng a inhawng zau sawt. Mahse, Jannik Sinner leh Daniil Medvedev te an la awm avangin nomawi an inchuh na hle tura ngaih a ni.

Nimin zing lam inkhel dangah Andrey Rublev erawh a chak lo - Russian tlangval hi Grigor Dimitrov lakah 6-3, 7-6 (7-3), 1-6, 3-6, 6-3 in a tlawm, player pahnihte hi darkar thum leh minute 39 chhung an inkhel a ni.

Bulgarian tlangval Dimitrov hian kum 2019 hnua a vawi khat nan US Open quarterfinal a lut a, kum nga liam ta khan Flushing Meadows-ah hian semifinal a lo thleng tawh a ni, tun ṭumah hian Frances Tiafoe a hmachhawn leh ang.

Dimitrov chuan, "Set hnih ka lak kha chuan ka dinhmun a ṭha tih ka hre tawh a, mahse set hnih dang a zawna a rawn lak leh thung kha chuan hlauhthawn a na duh hle, set tawpnaah khan a vannei zawk ka ni," a ti.

Inkhel angah Tiafoe hian Alexei Popyrin chu 6-4, 7-6 (7-3), 2-6, 6-3 in a hneh - Popyrin hian a match hmasa zawkah champion lai Novak Djokovic a hneh thei, mahse tualchhung tlangval Tiafoe lakah a ding tlang zo tawh lo.

American tlangval dang Taylor Fritz pawh a la chak zel - Fritz hian Norway tlangval, seeded pariatna Casper Ruud chu 3-6, 6-4, 6-3, 6-2 a hnehin a thiam zual pariat zingah a inhlangkai ve bawk.