Intercontinental Cup khel tur India

Football khawvelin international break a hmang ṭan a, India pawhin Intercontinental Cup an khel dawn - zanin dar 7:30 hian match hmasa ber an khel nghal dawn a, Mauritius an hmachhawn ang.

Hyderabad-a khelh tur Intercontinental Cup-ah hian India, Syria leh Mauritius te an inlan dawn a, ram pathumte hi an inkhelh kual vek hnuah a sang berin champion nomawi an chawi dawn a ni.

Zanina India hmachhawn tur Mauritius hi FIFA ranking-ah 179-na niin, Confederation of African Football (CAF) hnuaia awm an ni a, Blue Tigers tan harsa lo tura ngaih a ni.

India forward Lallianzuala Chhangte chuan, "National team-ah hun kan nei ho tam hman lo a, kan neih chhun chhun kan chhawr a ngai. Tun inelna zawhah Tri-Nation chu thla tharah kan khel leh dawn a, November-ah break a awm leh bawk ang.

"Chhuanlam siamna hun a awm lo a, Asian Cup qualification kan khelh tur hre rengin khelmual chhung leh pawnah chet ṭhat a ṭul. Kan taksa mai ni loin, kan rilru pawh a inpeih a ṭul a, ṭum dang zawng aia kan ṭan a ngai," a ti.

India inkhel tur hi coach thar Manolo Márquez hnuaia an match hmasa ber tur a ni a, Lallianzuala Chhangte bakah Lalengmawia Ralte (Apuia), K. Lalṭhathanga (Puitea) leh Edmund Lalrindika te chu squad-ah an awm bawk.