MPL11 a ngaihnawm chho zel

LZ Juice MPL11-ah match riat khelh a ni tawh a, semifinal khel tur leh relegate khel tur hriatthiam a la har hle. Hmahruaitu Chanmari FC leh Aizawl FC ten semifinal an khel ngei dawn tih a hriat theih a, mah se tun season aṭangin league-a pakhatna hnenah league champion nomawi pek an ni dawn. Club ṭha pahnih hi nuam sain an la awm thei lo.

Boruak a hot

I Day Football-ah Mizoram Police champion mah se MPL11-ah an che ṭha chhunzawm lo a, table mawngphaha awm FC Bethlehem nen vawi hnih inkhel tawhin point khat chauh an hmu. Police hi pathumnaah la awm mah se match hnuhnung pahniha point khat chauh an hmuh avangin point 10 chauh an la hmu a, FCB aiin point nga chauhin an hmu tam.

Police hnuai chiaha awm Sihphir Venghlun leh Ramhlun Athletic ten point kua ve ve an hmu a, SYS leh Chawnpuiin point riat ve ve an hmu. SYS hian match hnuhnung pathumah point hmu miah lo mah se Aizawl FC vawi hnih an hmachhawn bakah Chanmari FC an hmachhawn bawk avangin Lalmuankima hote hi dah hniam ngawt an la rem lo.

Chawnpuiin team enkawl turin Lalrindika Hmar an la lut a, a enkawlna hnuaia an chak nghal avangin semifinal beiseina a nung thar. Bethlehem hi table mawnghphaha awm ni mah se transfer an hmang ṭha a, round 6 thlenga point khat chauh la hmu khan round 8 a zawh meuh chuan point nga an hmu tawh. Lalhriatpuia Sailo hoten semifinal beisein an nei thar.

Top scorer tur?

Ramhlun Athletic FC striker Felix Lalruatsanga'n phase 1-ah goal riat a khung a, Serchhip tlangval hi goal khung tam ber la ni mah se lehpel theitu an la awm. Aizawl FC forward pahnih C. Lalhriatpuia leh Lalbiakdika ten goal ruk ve ve an khung tawh a, Felix-a umpha turin goal hnih chiah an mamawh tawh.

Farkawn tlangval C. Hriata hian match thum chhung goal a khung loh zawn hnuah MPL match hnuhnung pathumah goal a khung vek a, I League club rinrawl a nih bawk avangin goal a khung belh turah a ngaih theih.

Champhai Zotlang tlangval BD-a hming pawh lam hmaih a thiang lo. Aizawl FC winger BD-a hi I Day Football top scorer a nih hnuah hrem vangin match hnih a khel thei lo a, a rawn let hnuah goal a rawn khung lehnghal. Tun season MPL11-ah goal a lut tam ṭhin a, round 6-ah phei chuan goal 21 ngawt a lut a, hei vang hian tun season top scorer chuan goal 10 a khung pelh ngei a rinawm hle.