Chelsea-in chak an la harsat

Chelsea-in Wolverhampton 6-2 a an sawp hnuah harhtharna an la chang thei chuang lo a, kar laihawlah Servette 2-1 in an hneh lo a, Pathianni zan khan Crystal Palace nen 1-1 in an inhnehtawk.

Stamford Bridge-ah Cheslea-in nung takin inkhel bul an ṭan a, Cole Palmer a hmuhnawm nghal a, goal hmaah Noni Madueke a nung viau bawk. Blues-in an phu ang ngeiin minute 25-naah counter attack mawi zet hmangin goal an khung a, Palmer ball pek tawk zet chu Nicolas Jackson-a'n goal ruakah a khung.

Chelsea-in an goal khung an hum zo lo a, Palace tan Eberechi Eze a rawn inlar a, English midfielder hian minute 53-naah si phurh a sut. Blues hian chakna goal khung theihna hun ṭha an nei a, goal hmaah Jackson a hriam tawk lo.

Blues-in nipui bazarah £200mtd chuang an seng a, player 13 la lutin player 37 an chhuak; a nghet leh loan hmanga player che vel hi ṭhahnem mah se chak an la harsat reng.

Chelsea hian Palace an hmachhawn hma hian Jackson hi kum 2033 thleng atan contract an ziahpui. Senegal international striker Jackson chauh ni loin Blues player-ten contract an nei rei hlawm a, London club-in player contract an ziahpui dan hian mak tih a hlawh hle.