Real tan Kylian Mbappe a vul ve ta

UEFA Super Cup-ah goal a khung nghal avangin Kylian Mbappe-a'n fak rawn a hlawh a, mahse, hemi hnu league match thumah goal a khung miah lo - hetih chhunga Real Madrid point hmuh zat chu point nga a ni.

Mi tam takin Real chet chhiat chhanah Mbappe an kawk ṭan a, French forward tan khaw hawi a nuam lo ṭan. Mahse, player class sang up bo reng theih an ni lo a, Mbappe-a'n Real tan La Liga-ah goal a khung ve ta.

Pathianni zan khan Real hian an mikhual Real Betis chu league-ah 2-0 in an hneh a, Mbappe-a'n goal hnih a khung - goal hnuhnung zawk hi penalty aṭanga a chhuih luh a ni.

Real-in match li an khelh aṭangin point riat an nei ta a, match li an khelha chak vek Barcelona chiah an phak lo. Champion leh champion loh sawi nan a la hma a, mahse, Barca-in Hansi Flick hnuaia harh tharna an chan avangin Real tan chet ṭhat chhunzawm a ṭul.

Hlauhthawnna

Santiago Bernabéu-ah Real inkhel en turin fans 73,072 an pungkhawm a, an beisei goal erawh an hmu lawk lo - tun season-a an khelh dan thlir chuan fans ṭhenkhat an hlauthawng a, an demawm hran lo. La Liga match khat chiah an la chak miau a!

Real hian goal khung loin chawlhlawk an hmang phawt a, goal hmaa an vanduaina chu sawi uar theih a nih laiin, Betis lamin chance an neih ve tho avangin uang thei an ni lo tih erawh chiang takin a lang.

Mikhual team hian Abde Ezzalzouli hmangin chance duhawm tak an nei a, mahse, Moroccan winger hian hnai set sawt aṭangin, uiawm takin a tauh goal thei lo a, Real ṭantute an thaw huai ang.

Barcelona aṭanga loan-a Real Betis pantu Vitor Roque pawhin chance a nei a, mahse, kum 19 mi forward hian a ball khawih hmasak ber chu Real velh nan a hmang thei lo.

A tawpah chuan...

Team ṭha zawk Real an ngawi reng bik lo - minute 67-naah Mbappe a inlar a, French forward hian Federico Valverde-a backheel chu um lutin, Betis keeper Rui Silva tana dan rual lohin goal-ah a chantir.

Real-in an la duhtawk mai lo. Minute 76-naah Vinicius Jr. chuan penalty a hlawh chhuak a, a pet turin Mbappe a lo pen chhuak - Paris St-Germain striker hlui hian inringtawk takin goal-ah a chantir a, 2-0 in an chak.

Mbappe hi Real kawr nen a vanduai rei hle. La Liga-a a goal hmasa ber khung tur hian vawi 25 zet shot neih a mamawh a, Real Betis nena an inkhel bikah pawh goal a khung hma hian vawi sarih zet shot a nei hman.

Real hi an vanduai ve hrim hrim - Mbappe-a'n goal a khung hmain chanve vawi tam a hlah hman a, Eder Militao leh Valverde te chance neih pawh keeper Rui Silva enchhinna a chang a, Vinicius chuan post a pet per bawk.

Mbappe a hlim

Real tan league-ah goal a khung ta a, Mbappe a hlim. Kum 24 mi forward chuan, "Ka pressure neih chu team-a insiamrem a ni mai. Ka career-ah goal hi chu ka khung fo a, ka khung leh mai ang tih kha ka ring tlat.

"Match thum zet goal khung loh chu ka tan chuan a rei a, mahse, ka buai phah lo - ka khelhpuiten min ring tawk tlat. Football a ni mai a, pressure ka nei lo. Ka theihna ka hria a, he hmunah hian Kylian-a ni reng turin ka lo kal a, rim taka hnathawh zel ka duh," a ti.

Real boss Carlo Ancelotti chuan, "Goal a khung theih nan eng pressure mah kan siam lo. Kylian khan game ṭha tak a khel a, box chhungah a tal tam a, a chance neih a chhawr a, a thawkrim hle. Goal a khung avangin ka lawm a, mahse, kan vaia hnathawh kha ni ka thlir chu," a ti.

Italian coach chuan Vinicius fak zuiin, "Vinicius khan Mbappe penalty a pet tir a, a hma a sial lo hle. An inkar boruak a ṭha takzet a ni," a ti a, star player boruak a awm loh thu a sawi.