Bayern tan Muller a vul

Bayern Munich-in Pathianni zan khan SC Freiburg 2-0 in an hneh a, manager thar Vincent Kompany kaihhruaihna hnuaiah hnehna an la chang vek. Bavarians tan Harry Kane leh Thomas Muller ten goal an khung.

Allianz Arena-a inkhelah Bayern-in inkhel an thunun a, Jamal Musiala chevel a hmuhnawm a, goal a keng tel lo thung. Minute 38-naah Kane-a'n Mathys Tel-a penalty hlawh chhuah chu goal-ah a chantir a, first half-ah 1-0 a ni.

Bavarians squad a chhah ṭha a, second half-ah bench aṭangin Muller, Joao Palhinha, Kingsley Coman, Leon Goretzka leh Konrad Laimer te an lut. Germany tana inkhelh chawlhsan Muller-a'n a thiam a la theihnghilh lo a, Serge Gnabry hnen aṭanga a ball hmuh chu box chhungah mawi taka la thlain minute 78-naah goal ṭha bik a khung.

Kompany hote goal hnihin hma hruai mah se nuam sain an chak lo a, injury time-ah ball-in Palhinha kut a per avangin penalty an chawi. Freiburg tana pettu Lucas Holer-a'n a pet over luah a, Manuel Neuer tan tun season league match-a a clean sheet-na hmasa ber a ni.

Kum 34 mi Muller hian Bayern tan competitive match vawi 710 a khel a, club tana khel tam ber record Sepp Maier-a siam chu a khum. German forward hian 2008/09 season aṭangin Bayern tan a khel ṭan a, season 16 chhung a zawnin a goal a khung tawh. Muller hian Bundesliga-ah goal 150 a khung tling chiah bawk a, hetiang tithei player 17-na a ni.