Juventus leh Roma inhnehtawk

Serie A tun season kal laiah Juventus chuan a vawi khat nan point an hloh - Pathianni zan khan Old Lady hi an mikhual AS Roma nen goal awm lo, 0-0 in an inhnehtawk a ni.

Thiago Motta enkawl Juve hian season bul an ṭan fuh a, match hmasa pahnihah si thum fai ve ve in hnehna an chang a, an hnehte hi team lian an ni lo thung, tunah erawh team ṭha Roma lakah an chak zo lo.

Team ṭha an tawn hmasa berah point an hloh a, hei vang hian Motta naute hi eng ang taka ṭha nge an nih sawi thiam a la harsa, champion tur chuan an elpui tur club lian dang hneh thei nih a pawimawh dawn a ni.

Juventus manager Motta chuan, "Tun ṭum chu team ṭha tak kan hmachhawn a, a bik takin inkhel chawhma lamah khan kan talbuai hle, a hnu lamah erawh insiamṭhain hma kan sawn hret.

"Roma khan hmunawl min pe duh miah lo a, an ding khawng hle - khatiang team kha chu hmachhawn an harsa. Chutihrualin kan khingpui a zirin player khel thiam kan nei zel, chuvanga point hmu kan ni," tiin a sawi.

Serie A match thum an khelh tawh chinah champion lai Inter Milan, Juventus, Torino leh Udinese te chuan point sarih ṭheuh an hmu a, an hnuaiah hian Hellas Verona leh Napoli an awm bawk.