NBA Playoff Lakers leh Bucks in semifinal lut

Inrinni khan NBA Playoff khelh chhunzawm a ni a, Los Angeles Lakers leh Milwaukee Bucks ten Portland Trail Blazers leh Orlando Magic te hnehin semifinal an lut.

Regular season-ah Lakers leh Bucks hi an conference-ah pakhatna an ni ve ve a, playoff match hmasa berah an chak lo ve ve. Amaherawhchu team ṭha danglamna a lang a, LeBron James leh Giannis Antetokounmpo awmna team-ten 4-1 ve ve in hnehna an chang.

Milwaukee khaw bul Kenosha, Wisconsin-ah Police-in mihang Jacob Blake vawi sarih an kap a, hemi a nih avang hian Milwaukee Bucks-in a do nan game 5 khel duh loin an nuar.

USA rama infiamna hrang hrangah nghawng lian tak a nei zui a, NBA-ah bik ni thum chhung playoff khelh a nih loh hnuin NBA official te, player te, coach leh staff te inbiaknain rah ṭha thlenin Inrinni khan inelna an chhunzawm.

Portland Trail Blazers-in inhliam vangin game 1-a hnehna chanpuitu Damian Lillard an chhawr thei lo a, LA Lakers tan harsatna hranpa a awm lo.

Lakers thiampuipa LeBron James-a'n point 36 bakah rebound leh assist vawi 10 ve ve a nei a, Anthony Davis pawhin point 43 a nei bawk.  Lakers hian Portland Trail Blazers 131-122 in an hneh a, Blazers hi CJ McCollum-a point 36 in an chhan zo lo. LeBron James te hian semifinal-ah Houston Rockets leh Oklahoma City Thunder chak zawk an hmachhawn dawn. Nimin zing khan Rockets hian Thunder hi 114-80 in an hneh a, 3-2 in hma an hruai. Game 6 hi September 1, Thawhlehni zing dar 6:30-ah an khel ang.

Milwaukee Bucks-in Giannis Antetokounmpo an kawl miau a, game 5-ah Orlando Magic 118-104 in an hneh.  Giannis hian point 28 a neih bakah rebound vawi 17 a la. 

Bucks hian semifinal-ah Miami Heat an hmachhawn dawn. Heat hian quarterfinal-ah Indiana Pacers chu 4-0 in an sawp a, player langsar fal kawl mah se Giannis leh a ṭhiante tan en liam mai chi an ni lo.

Heat hian forward Jimmy Butler, center Bam Adebayo leh guard Goran Dragic te an neih avangin upset thleng ve thei a ni. Semifinal game 1 hi September 1, Thawhlehni zing dar 4:00-ah khelh a ni ang.

Eastern Conference-ah semifinal hel tur a hriat kim tawh. Bucks leh Miami bakah Boston Celtics leh Toronto Raptors te an inkhel dawn. Raptors leh Celtics  te hian nizan khan game 1 an khel a, September 1-ah game 2 an khel leh ang.

Western Conference-ah LA Lakers chauhin semifinal an la lut a, Thunder leh Rockets a chak zawk nen an inkhel dawn. Semifinal dangah Dallas Marvericks leh Los Angeles Clippers inkhela chak zawkin Denver Nuggets leh Utah Jazz inkhela chak zawk an hmachhawn ang.

Jazz hian 3-2 in hma an hruai mek a, tukin zing khan game 6 an khel. Clippers pawhin nizan game 6 inkhela Marvericks an hneh chuan semifinal an lut ang a, an inhnehtawk erawh chuan September 1, Thawhlehniah game 7 an khel ang.