Brighton-in Chelsea an chelh

Falmer Stadium-ah Chelsea-in season thar atana inpuahchah nan Brighton & Hove Albion an hmachhawn a, 1-1 in an inhnehtawk. Blues player thar Timo Werner chuan minute lina lekah a khung nghal a, Seagulls-in minute 90-naah Pascal Gross-a penalty hmangin an sut.

Frank Lampard-a hote hian Premier League ṭan hunah Seagulls hi an hmachhawn lehnghal dawn a, September 19 khian Falmer Stadium-ah bawk an inkhel ang. Blues hian September 20-ah champion lai Liverpool an mikhual nghal dawn a, season thar a nghahhlelhawm tawh hle.

Brighton leh Chelsea inkhela chanchin chhinchhiahtlak erawh social distancing dan zawm chungin entu 2,524 an awm. Thuneitu lamin inkhel entu awm theih dan an zawng chho mek a, season chanve chhoah chuan entu an awm theih a beiseiawm.

Friendly match-ah hian Blues player thar Hakim Ziyech cross chu Callum Hudson-Odoi-a'n tauh thlain Timo Werner-a'n a khung. Germany international hi offside ang viau mah se VAR a awm lo. Second half-ah Kepa Arrizabalaga thlaktu Willy Caballero-a'n Neal Maupay penalty pet a dang a, Argentine keeper hian minute 90-naa Gross-a penalty erawh a dang thei lo.

Chelsea winger Ziyech chu second half-ah khup hliam vangin lakchhuah a ni a, Morocco international dinhmun tak hi a la hriat loh. Inkhelh banah Frank Lampard-a'n Ziyech dinhmun tak hre turin medical lamin an zirchian phawt a ṭul thu a sawi.