India final kalkawng dal tumtu Australia

ICC World Cup 2015 hmawr an bawk hnai tawh a, naktuk zing dar 9:00 khian champion lai India leh Australia an inhmachhawn dawn. Khawvel cricket ram lian pahnih an ni a, World Cup semi-final khel tur an nih bawk avangin ram pahnih inkhel tur hi a te thei lo.

Sydney Crikcet Ground, Australia a inkhel tur an nih avangin Australia hi huangtau zawk turah ṭhenkhat chuan an ngai maithei. Mahse, Sydney-ah pawh Australia aiin India in ṭantu an ngah zawk dawn a nih hmel a, mi 42,000 lenna SCG stadium-a ticket 70% chu India fan-te'n an chang. Australia captain Michael Clarke leh a team-mate David Warner te chuan an twitter account lamah Australia mipuite chu anmahni ṭan tura kal ve turin an sawm hial.

Team intluk tlang chu

ICC World Cup-ah Australia aia record nei ṭha an awm lo a, vawi li lai an champion tawh. An champion hnuhnun ber chu kum 2007 kha a ni daih tawh.

Australia hian World Cup match 83 an khelh tawhah vawi 60 hnehna an chang thei a, an chakna percentage hi 72% zet a tling. Australia tan an innghahna tur chu an bowler che ṭha em em mai Mitchell Starc hi a ni. Kum 25-a upa fast bowler hi kumin World Cup-a bowler che ṭha ber pawl a ni a, match ruk a khelhah wicket 18 a la thei a, Australia semi-final kalkawngah a thawhhlawk hle. Khawvel batting line up ṭha ber pawl India batsman te hi a vawm darh thei ang em? tih hi zawhna chu a ni.

Captain Michael Clarke kaihhruaina hnuaia khel tur Australia hian khawvel cricketer ṭha ber ber pawl George Bailey, Mitchell Johnson, Shane Watson leh Glen Maxwell te ho an kawl avangin team tum châkawm an ni lo.

India hian Wolrd Cup ṭan hmain sawisel an tawk nasa em em a, champion lai mah nise kum 2011-a an champion squad ami player pathum chiah an awm tawh avangin champion tura rinkai zingah an tel lo. Mahse, World Cup an ṭan a, India player te'n anmahni sawiseltu te field chhungah an chhang a, group stage-a an match khelh vawi rukah hnehna chang vekin quarterfinal-ah Bangladesh an hneh a, semifinal an lut.

Batting line-up neih ṭhat vanga hming ṭha ṭhin India hi bowling lamah pawh an chhe lo. Match sarih an khelh tawhah an khingpui te an vawm 'out' vek zel a, wicket 70 zet an la tawh.

Kum 1983 leh 2011 World Cup champion hi batting lamah pawh Virat Kohli, Shikhar Dhawan, Rohit Sharma, Suresh Raina, Ajinkya Rahane leh captain MS Dhoni te an awm avangin an ngaihtuahawm loh ang.

Eng nge an sawi?

Australia coach Darren Lehmann chuan, "SCG hi batsman te tana khelhna nuam tak a nih avangin run tam tak hmuh tur a awmin ka ring," a ti.

Australia captain Michael Clarke chuan, "India hi Australia-ah an practice rei tawh avangin kan khelmual te an hre chiang em a, tum an hautak ang. World Cup ṭan dawn khan champion tura ka rin zingah India hi ka sawi tel a, ka sawi dik khawpin ka hria. India hneh turin kan theihtawp kan chhuah a ngai dawn a, kan ṭhat dan bera kan khelhchhuah a ngai dawn a ni," tiin India tum chu a hautak tur thu a sawi.

India captain MS Dhoni.chuan, "Kan chi ai tur a ni lo a, kan khelh dan phung pangngai ang hian hlauthawng loin kan khel reng tur a ni. Chutianga kan tih theih phawt chuan kan tan champion a harsa lo ang," a ti.