Gerrard leh card sen pariat

Pathianni zan a Liverpool leh Manchester United inkhelh ṭuma Steven Gerrard-a red card hmuh kha a inkhelh hunchhunga red card ṭum riat a hmuhna a ni. Liverpool kawr ha chung in vawi sarih hnawhchhuah ni tawh in England kawr ha chungin vawi khat hnawhchhuah a ni tawh bawk.

1. Field chhungah sec 38 chauh a awm hman tih in Liverpool captain Gerrard chu hnawhchhuah a ni. Second half-a rawn lut Gerrard hian Manchester midfielder Ander Herrera a rah luih vangin red card a hmu a, inkhel pawimawh takah 2-1 in an tlawm zui.

2. Kum 1999 khan Liverpool leh an hmelma Everton ten Merseyside derby an khel a, he inkhelah hian hetih hunlai a kum 19-a upa rawlthar Gerrard-a chu second half-ah luh tir a ni. Minute 90-naah Everton striker Kevin Campbell a tlawh vangin a vawikhat nan hnawh chhuah a ni. He mi ṭum hian Liverpool hi 1-0 in an tlawm nghe nghe.

3. Khum 2001 khan Liverpool leh Leeds United te chu Premier League-ah an inkhel, Gerrard chu Leeds defensive midfielder David Batty laka a foul avangin minute 71-naah hnawhchhuah a ni. Liverpool hi 2-1 in an chak lo zui bawk.

4. Kum 2001 vek khan Gerrard chuan Premier League-ah red card a hmu leh bawk. September thlaah Aston Villa nen an inkhel a, Villa defensive midfielder George Boateng laka ṭul lo tak a a foul avangin hnawhchhuah zui nghal a ni. Player pakhat a tam zawk Aston Villa hi Anfield-ah 3-1 in an chak zawk a ni.

5. Kum 2003 khan Liverpool leh Chelsea te chu Premier League-ah an inkhel a, yellow card vawi hnih hmuh vangin Gerrard chu hnawhchhuah a ni. Gerrard hi Chelsea midfielder Graeme Le Saux laka a chet mawi loh avangin yellow card vawihnihna a hmu. He inkhelah hian Liverpool hi 2-1 in an chak lo zui a, season tawpah Chelsea hi Liverpool chungah awmin Champions League khel turin an inhlang kai zui.

6. Merseyside derby boruak san ṭhin zia chu kan hre vek awm e, kum 2006 khan Premier League-ah Liverpool leh Everton an inkhel a, minute 18 na lekah Gerrard chu yellow card vawihnih hmuh vangin field aṭang a hnawhchhuah a ni. Ball a pet sawn luih vang a yellow card a hmuh tawh hnuah Everton midfielder Kevin Kilbane a kalh thluk avangin yellow card a hmu nawn a ni. Captain tel loin khel mah se Liverpool hian 3-1 in hnehna an chang zui ta tho a ni.

7. Eng tournament pawh nise Manchester United leh Liverpool inkhel hi a boruak a te thei lo hrim hrim. Kum 2011 January thla khan FA Cup-ah an inhmachhawn a, Michael Carrick nen an inbeihna a che mawi lo Liverpool captain Gerrard chu straight red hmangin hnawhchhuah a ni. Old Trafford-ah 1-0 in Liverpool an tlawm.

8. Kum 2012 khan World Cup qualifying-ah England chuan Wembley stadium-ah Ukraine an mikhual a, England captain Gerrard chu minute 88-naah Ukraine midfielder Denys Garmash a tlawh avangin hnawhchuah a ni.