World champiom hmaah Asia Champion ding dawn

Nilaini hian FIFA World Cup 2014 champion Germany leh Asian Cup 2015 champion Australia te chuan friendly match Germany-ah an khel dawn.

An inkhelhna tur stadium Fritz-Walter-Stadion-ah hian kum 2006 World Cup khan Germany chuan Japan 3-1 in an lo hneh tawh.

Australia hian kumin January thla khan Asian Cup an thleng a, final-ah South Korea hnehin a vawikhat nan an champion. Cricket thiam ram tia hriat lar ni ṭhin mah se tunah chuan football thiam ram an ni tih chu khawvelin a hre tawh. An phur vanglai tak anih avangin inrintawkna sang tak nen German an hmachhawn thei ang.

Coach Joachim Low-a enkawlna hnuaiah Germany hi an khel ṭha tluang hle a, player ṭha awmkhawmna an nih bakah team thawhhona a ṭha hle. International match an khelh hnuhnung berah pawh Spain chu an ramah 1-0 in an va hneh a ni. An rama inkhel tur an ni bawk a an mikhual tur hi an hlau vak in a rinawm loh.

Australia lamah hian in­hliam vangin senior midfielder kum 35-a upa Tim Cahill leh defender Matthew Spiranovic te chu an khel thei lo ang. James Troisi, Mathew Leckie leh Nathan Burns te hi tlar hmalamah chuan an hma­chhuan tur an ni ang.

Germany lamah captain Bastian Schweinsteiger a inkhel thei tawh tur a beisei a ni. Pathianni khian Euro 2016 qualifying-ah Georgia an hmachhawn dawn bawk, Group D-ah Poland hnuaiah an awm avangin ṭan an ngai hle. Hetiang dinhmuna an din mek avang hian an tan chuan inbuatsaihna hun ṭha a ni ang.

Spain lama kal tura an sawi rik fo Germany coach Low chuan, "South Africa-a European team champion thei hmasa ber kan ni thei kha kan lawm em em a, kha khan inrintawkna min pe in kan tan chuan theihnghilh theih a ni tawh dawn lo. Spain lam a kal tur angin min sawi fo a, tunah chuan engmah sawi lawk tak tak theih a la ni lo. 2018 World Cup Russia-a kan neih zawh hunah chuan Spain-ah hian ka la kal maithei. Mahse tunah chuan Germany coach ka ni a, Australia nena kan inkhelh tur hi a pawimawh ber rih a ni," tiin a sawi.

Australia coach Ange Pos­tecoglou chuan, "World champion nen kan in khelh dawn avangin kan in khel tur hi friendly mah nise a nep thei lo. Asian Cup champion thei kan nih ve tho avangin kan hlau bik lo a, chak ngei tumin theih tawp ikan chhuah ang," tiin a sawi.