Khelh duh Shay Given

Veteran keeper Shay Given chuan Pathiannia Republic of Ireland-in Dublin-a Poland an mi­khual hunah starting ele­ven chan a beisei thu a sawi.

Kum 38-a upa Given hi Euro 2012 zawh khan ram tana khelh a chawlsan a, nikum favang thla bawr vel khan koh let leh a ni.

Given chuan, "Poland nena kan inkhelh tur hi a pawimawh a, chuvangin khelh ngei ka duh. Mah se player khel tur thlangtu tur ka ni lo a, ka tih theih chu theihtawp chhuaha training a ni. Aston Villa-ah khelhna chance min pek chuan ka khel ṭha a, chu chuan ram tan khelh beiseina min pe a ni," a ti.

Ram tana vawi 127 khel tawh Given-a elpui chu Millwall keeper David Forde a ni. Inrinnia Brentford leh Millwall te 2-2 a an inhnehtawk ṭumin Forde hian ṭha tak takin a dang a, first keeper a ni chhunzawm a nih pawhin Given hian a pawm thlap thu a sawi tel bawk.