Mathieu koh loh vangin Deschamps a inchhir lo

France coach Didier Des­champs-a'n squad-ah defender Jeremy Mathieu a ko tel lo. French defender hian El Classico-ah Barca tan goal a khung leh si avangin sawi zui hlawh a, Deschamps a inchhir phah lo.

Deschamps chuan, "Inchhir? thutlukna ka siam tawh alawm. An inkhel hnuhnung ber kan thlir chuan a ṭhenin goal an khung a, a ṭhen phei chu an khel lo ang. Player kan thlan apiang hian ka thlan loh che ṭha hi media sawi nuam tih zawng a ni. Uluk taka kan ngaihtuah hnua squad hi tihfel a nih avangin inchhirna tur ka nei lo," tiin a sawi.

France boss chuan, "Tuna ka thusawi avang hian Jeremy Mathieu hi a hman tlak loh tihna a ni lo. Tawnhriat nei mah se eng emaw ti chhung khan khelhna hun a nei tlem a ni. Tun aia khelh tam hi a mamawh a ni," tiin a koh loh Mathieu chungchang a sawi.

Benzema chungchang sawi zuiin Deschamps chuan, "Real Madrid tan a khel ṭha a, keini tan pawh a khel ṭha bawk. Tuna a chet ṭhat hi a chhunzawm zel a ngai a, a harsa lai chu France ah chuan kan mamawhna hi a tam lehzual avangin an theihna tam zawk kan mamawh a ni. Real-ah goal a khung a, amah pui turin Ronaldo a awm. Chutihrualin France-ah a khelh dan a tih danglam a ngai chuang lo," tiin a sawi.

Pathianni zana El Classico-ah Benzema hian Ronaldo goal khung tur a siam sak. France hian Euro 2016 an thlen dawn avangin qualifier an khelh ve a ngai lo. Ningani zan hian friendly match-ah Brazil an mikhual ang a, Pathianni zanah Denmark an hmachhawn leh ang.