Europe player lo tan Premier League-ah chance a tlem dawn

England-a football thuneitu sang Football Association chairman Greg Dyke chuan Premier League chu English mipuite laka hlutna hloh thei mai dinhmunah a din mek thu a sawi. FA hian England league hrang hranga Europe khawmualpui mi ni lo khel thei chin chu bithliah thar siam an tum a ni.

FA hian kum 2013 khan England football dinhmun zirchiang tur hian FA commission a lo din tawh a, Commission te'n uluk taka an zirchian hnuin English player tam zawkin Premier League an khelh theih dan tur chungchang leh tun hma zawng aia work permit pek chhuah chungchangah khauh zawka kal an tum a, work permit chungchanga an rawtna bik hi Home Office chuan a pawmpui tawh a, May 1 aṭangin hman ṭan a ni ang.

Ruahmanna thar hi Thawhṭanni khan FA hian an puang zar a, an ruahmanna thar hi a hnuaia tarlan ang hi a ni.

1. Tun hmaa 'home grown' (tualchhung) player ni tura kum 18 a nih aṭanga club a inziak lut a ni tur a ni tih ṭhin chu kum 15-ah tih hniam a ni.

2. Team khat squad member 25 zinga pariat English player ngei an ni tur a ni tih chu 12-ah tihsan a ni. Hei hi kum 2016 aṭanga hman ṭan tur a ni a, kum li chhung hman chhin phawt a ni ang.

3. Tualchhung player pahnih tal chu an khelhna club-in an chherchhuah ngei an ni tur a ni a, kum 15 an nih aṭanga club a inziak lut an ni tur a ni.

4. Europe khawmualpui pawn lam mi England-a khel tur chu players ṭha tak an nih ngei a ngai dawn bawk.

FA chairman Greg Dyke chuan, "Kan ruahmanna te hi club leh League hrang hrang thuneitute kan sawipui anga, kan ruahmanna hi English Football tan hlawkna nasa tak a nih thu hi kan hrilh hriat an ngai a ni," a ti.

Dyke chuan tun season-a English player khel ṭha em em mai Harry Kane chu entirna atan la chhuakin, "Kan ruahmanna hi a ṭhat zia tilangtu chu Harry Kane hi a ni. Naupang te ni chungin Spurs tan a khel a, tunah chuan Premier League top scorer a ni mek a ni. Harry Kane anga inthuk ru English players zingah engzat nge kan neih ang? Tim Sherwood kha Tottenham manager la ni se chuan bench-ah a ṭhut mai mai loh pawh Millwall emaw club dangah loan in a khel anga, vawiina kan hmuh ang hi kan hmu lo ang," tiin talent in phum ru chance neih loh vanga par chhuak lo mai mai an tam a rin thu a sawi.

Kum 67-a upa Dyke chuan, "Vawiina ka ruahmanna siam thar hi kum nga liamta velah khan lo hmang tawh ni ila chuan vawiina foreign players kan hmuh tam tak hi kan hmu lo ang. Players ṭha bik leh thiam bik an awm a, chung mite chu dan ngawt theih pawh an ni lo. Mahse, English player te aia thiam bik chuang lo tam tak hi an awm ve bawk a ni. Kan rua­hmanna ang zawng zawng hi a kaltlang thei a nih ngat chuan tun aṭanga kum thum kum ngaah chuan vawiina English players 20% vel hi 40% velah a in vawrh kang nghal dawrh thei ang. Hei hi English Football division tan a pawimawh em em a, Premier League club te tan a pawimawh lehzual a ni," a ti.

Dyke chuan Champions League-a in lar pha chin English players an tlem chu pawi a tih thu sawiin, "Champions League khel ṭhin player te kan en chuan German, Spanish leh Brazilian hi English player nena khaikhin ralah chuan an tam bik em em a ni," a ti.

England tan pawha lo khel tawh FA commission player Danny Mills chuan, "Work permit dil zinga 95% hi a tlang ziah a , hei hi a ṭha lo a ni. Khawvela players ṭha ber ber England-ah hian rawn inkhel ngei se kan duh. Mahse, Championship leh League Two thlengin foreign pla­yer kan lalut a, hei hian English player a tih tlem phah a, a ṭha lo zawngin English football a nghawng a ni," tiin work permit khauh zawka an kalpui dan tur chungchang a sawi bawk.