New Zealand in final an lut Ropui takin South Africa an hneh

ICC World Cup 2015 semifinal hmasa zawk nimin khan New Zeland leh South Africa te'n an khel a, World Cup final la khel ngai lo team pahnihah New Zealand in an record duhawm lo thai bo in wicket li in hnehna an chang.

Eden Park, Auckland-a inkhelah hian New Zea­land tan Grant Elliott chu chhandamtu a ni. Kum 36-a upa all rounder hian a la tar lo tih tilangin inkhel inhnehtawk takah run 84 a vaw chhuak a, 'Player of the Match' ah thlan niin ram in a mamawh lai berin a parchhuak.

Inkhel hmuhnawm chu

Ṭhumvawra vannei zawk South Africa in bat hmasak an thlang a, hma takah an opener pahnih Hashim Amla leh wicket-keeper batsman Quinton De Kock te an out. Mahse, Faf Du Plessis leh captain AB De Villiers te'n South Africa hmun himah an rawn hlangkai a, over 43-ah run 281 tlin in mi panga an hloh. Inkhel hi ruahsur in a tihbuai vangin over 50 khelh tur aṭangin over 43-ah tih hniam a ni.

Ruahsuar hian South Africa inkhel a tibuai a tih theih, over 50 khel kai ngat se chuan run 300 chuang an vawchhuak ngeiin a rinawm. Over tawp thlenga out lo De Villiers-a'n ball 45-ah run 65 a vawchhuak a, over 50 thleng khel kaiin ruah sur in inkhel tibuai lo se chuan century siam thei dinhmunah a ding.

New Zealand bat hun a thleng a, Eden park-a anmahni ṭan tu mi singli chuang hmaah an phur hle. Captain Brendon McCullum-a'n a naute tan entawn tur rawn hnutchhiahin ball 26 lek a hmachhawnah run 59 a vawchhuak.

Inkhel tawp dawn lam thlengin New Zealand in South Africa an um chho zak zak a, chak ngei an tum. Ball 11 chauh a awm tawh tihin New Zeland in chak turin run 23 an la mamawh a, dinhmun ṭha zawka ding chu South Africa a ni. Chak zawk awm lo a an inhnehtawk a nih chuan Black caps dinhmun a ṭha zawk a, group stage-ah an khelh ṭhat zawk vangin an tlang daih thei.

Inkhel ni a tawp lam a hnaih a, ball hnih chiah a awm tawh tihin New Zealand in chak tura run an mamawh zat chu run nga a ni. Boruak sang tak hnuaiah Grant Elliott a zam duh lo a, six run vawchhuakin New Zealand a chakpui ta a ni.

South Africa in players in man tawk loh an tuar a, an fielding tight ṭha in four run ni ngei tura ngaih vawi tam dang mah se out ngei tura ngaih vawi li vel an inrin thul vang in an out lo a, New Zealand in hei hi an chak phah a tih theih a ni.

Eng nge an sawi?

Final-a a team hruai thlengtu Grant Elliott chuan, "Kan chakna hi keimah leh ka ṭhiante tan chauh ni lovin vawiina min rawn ṭawiawmtu mipui heti zozai tan hian a ni. Ball ka hlapchhuah apiangin mipui 40,000 chuangin min lo au phur a, khatiang taka in auh phurna hnuaiah kha chuan khelh a nuam em em a ni. Kan World Cup final hmasa ber ni dawn mah se zam lo in huaisen takin game dang ang tho in kan khel ang," a ti.

New Zealand captain Brendon McCullum chuan, "Ka naute khan an khel ṭha takzet a, ka chhuang takzet a ni. Grant Elliot khan boruak sang tak hnuaiah zam miah lo in a khel a, kan chak phah ta a ni. Vawiin kan game kha cricket khawvel tan chhinchhiah tlak a ni a, kan khelh danah ka lawm takzet a ni," a ti.

An khingpui South Africa fakin Mc Cullum chuan, "South Africa khan an khel ṭha takzet a, game harsa tak min khelhpui a ni," a ti.

South Africa captain AB de Villiers chuan, "Game ropui tak kan khel a, kha bak kha beisei tur kan nei chuang lo. Kan rilru a na em em a, kan ram lama beiseina sang tak nena min lo thlirtu kan mipuite tan kan khel a, kan chak zo ta si lo. Mahse, kan tumna leh theihna zawng zawng kan lantir a, zaninah chak lo mah ila kan ram mipui te'n min chhuang hle in ka ring a ni. Final a lut te ka lawmpui takzet e," a tiin a sawi.