England squad aṭangin Sturridge a chhuak
Liverpool striker Daniel Sturridge chu a khel bawr na vangin England squad aṭangin a inhnukdawk.
Pathianni zana Manchester United leh Liverpool inkhelh aṭang khan Sturridge hian harsatna a nei a ni. Zirtawpni a England-in Euro 2016 qualifier a Lithuania an hmachhawn hunah a tel theih dawn loh bakah Thawhlehnia Italy nen friendly match an khelh turah a tel thei dawn lo a ni.
Sturridge a teammate Adam Lallana pawh a ṭhalna vangin England squad aṭangin a inhnukdawk bawk. Ani pawh hi Manchester United nen an inkhelh ṭuma inhliam tho a ni a, a aiah Tottenham midfielder Ryan Mason koh a ni.
Liverpool striker kum 25-a upa Sturridge hi nikum September thla a Norway nen an inkhelh hnuah ram tan ala inkhel leh lo a, Euro 2016 qualifiers-a Switzerland, San Marino, Estonia leh Slovenia an hmachhawn ṭum bakah friendly match a Scotland an khelh ṭumin a inlan thei lo tawh bawk.
Group E-ah England hian an khingpui an la hneh fai vek a, group leader ni mekin Euro 2016 France a khel tura inhlangkai turin an dinhmun a ṭha rih hle. Group a pakhatna leh pahnihna hi Euro 2016 khel turin an tling nghal ang.
Sturridge a hliam hi chanchin lawmawm loh ni mah se Tottenham striker Harry Kane tan erawh khelhna hmun a tam phah sawt ang. Tlarhmaah United captain Wayne Rooney leh Arsenal striker Danny Welbeck te nen khelhna hmun an inchuh dawn a ni.