Vawiinah MPL champion Aizawl FC an chhuak dawn
Mizoram Premier League Season 3 champion Aizawl FC chuan vawiin hian I-League 2nd Division, 2015 khel turin Silliguri panin Aizawl an chhuahsan ang.
Aizawl FC tan tun ṭum hi an vawi li telna tur a ni a, anni bakah Mizoram aṭangin Chanmari FC an tel bawk ang. I League second division khel turte chu Aizawl FC, Chanmari FC, Hindustan (Delhi), Kenkre (Mumbai), Lonestar Kashmir (Jammu and Kashmir), Mohammedan (Kolkata), PIFA (Mumbai) leh United (Kolkata) te an ni.
Khelh dan hmang
India ram club-te tana football inelna sang ber dawttu hi double leg league-a khelh a ni. Silliguri-ah hian first leg khelh a ni ang a, vawi khat ṭheuh an inkhelh kual hnuah Golaghat, Assam-ah an inkhel chhuak leh ang. Point hmu sang ber chauh season thara I League khel turin an tling ang.
Aizawl FC hi an kal tluan chuan March 26, Ninganiah Sillguri an thleng anga. Pathianni hian Santosh Trophy-a Mizoram champion-na hmun Kanchenjunga Stadium-ah Lonestar Kashmir nen an match hmasa ber an khel ang.
Beiseina nen
Aizawl FC technical director Hmingthansanga chuan, "National Games-a kan champion ṭum khan player tam zawk kha Aizawl FC player te an ni a, foreigner tel loin Kolkata-ah Mohammedan nen kan friendly match kan khel a, 0-1 chauhin kan chak lo. Foreigner tel loa kan el tawk avangin I League khel pha turin kan squad hian theihna kan neihah kan ngai a, team pawh kan phur khawp mai," tiin a sawi.
Hmingthana chuan sawi chhunzawmin, "Santosh Trophy leh National Games-ah Mizoram kan champion tawh a, kan hmabak chu I League khelh hi a ni. Mizoram club hian theihna kan nei a, tun hi kan hun ṭha a ni tih kan hria. Chutihrualin team ṭha vek an nih tawh ṭhin avangin vanneih a pawimawh khawp ang. Kan inpuahchahna a ṭha a, club hotute a bik takin NECS aṭangin ṭawiawmna kan hmu ṭha a, I League khelh ngei tumin theihtawp kan chhuah ang," tiin season thara I League khelh a tum ruh hle.
Aizawl FC Squad
Goalkeeper :
1 Zothanmawia College Veng
2 Lalmalsawma Mamit
3 Kenneth Malsawmthanga Churachandpur
Defenders
4 Lalrozama Fanai Bawngkawn
5 Imanuel HS Lalthazuala Bawngkawn
6 Lalramchullova Armed Veng
7 Emmanuel Chigozie Nigeria
8 Lalthakima Khawzawl
9 Toky Zomuanpuia Mission Vengthlang
10 Thomas Lalengkima Thakthing
Midfielders
11 R. Malsawmtluanga Darlawn
12 David Lalrinmuana (C) Zemabawk N
13 Rohmingthanga Lengpui
14 Reuben Zosangpuia Dinthar
15 H. Lalbiakthanga Kawnpui
16 Brandon VL Remdika Hunthar veng
17 Albert Zohmingmawia Kawnpui
18 B. Zoramthara Leitan
19 Laldampuia Kawrtethawveng
Forward
20 Morgan Justice Nigeria
21 Alfred Kemah Jaryan Liberia
22 William Lalnunfela Ṭumpui, Kolasib
23 Michael Lalremruata Khatla