Leeds player manto ber Rodrigo

Premier League kai thar Leeds United chuan chanchin thar an neih belh ve zel a, Spain forward Rodrigo chu an club player manto ber ni turin pound maktaduai 26-in an lalut. 

Valencia aṭanga an lakluh forward hian kum li khel turin contract a ziak a, Leeds-in kum 2000-a West Ham aṭanga pound maktaduai 18-a defender Rio Ferdinand an lakluhna record chu a rawn khum a ni.

Brazil-a piang Rodrigo hian 2010-11 kha Bolton Wanderers tana lo khel tawhin beisei angin a khel ṭha tawk lo a, a vawi hnih nana chance a neih takah chuan English football-a a season hmasa zawk kha theihnghilh a duh ang. 

Real Madrid B team aṭanga a career ṭantu striker hian Bolton-a a hlawhchham hnuin Benfica-ah a hming a chher a, kum 2014 khan Valencia hi a pan - Valencia tan match 220 khelin goal 59-a khungsak a, assist vawi 41 a nei. 

Rodrigo hian season hmasaah khan Valencia tan match 34 khelin goal sarih a khung a, assist vawi 11 a nei bawk - Spain tan vawi 22 inlanin goal riat a khung tawh bawk. Kum 16 hnua Premier League khel tur Leeds hian  Germany defender Robin Koch chu Bundesliga club Freiburg aṭangin an lalut bawk a, kum 24 mi defender hi a man zat tarlan ni lo mah se pound maktaduai 11.5 niin tarlan a ni a, pound maktaduai 13 thlengin a sang chho thei ang. 

Germany tana vawi hnih inlan tawh Koch hian kum li chhung atan contract a ziak a, Freiburg tan match 87 khelin season hmasa khan Bundesliga-ah pariatna a nihpui - German centre back pasang hi karleha UEFA Nations League-a Spain leh Switzerland hmachhawn tur squad-ah telh a ni. Koch hian Leeds pan turin English club-a khel mek midfielder Mateusz Klich-a rawn thu a sawi a, ani hi Kaiserslautern tana a khelhpui ṭhin a ni. Koch chuan, "Marcelo Bielsa hnuaia Leeds hmasawnna ka hria a, mahse ka ṭhianpa hnen aṭang ngeia hriat kha ka tan a ṭha lehzual a ni," tiin a sawi.