Man Utd-in Van de Beek an ngaihven

Manchester United-in midfielder Donny van de Beek an ngaihven a, Dutch midfielder hi Inrinnia Ajax leh Eintracht Frankfurt ten friendly match an khelh ṭumin an telh lo. 

Ajax coach Erik ten Hag chuan, "Donny van de Beek hi a hma lam hun atana indawrna a awm avangin a chawl rih a ni," tiin a sawi a, chhuak thei dinhmunah a ding.

Manchester United-in transfer boruakah thawm lian tak an nei nghal a, Borussia Dortmund aṭangin Jadon Sancho an lalut ngei dawn niin a lang hman. Amaherawhchu thla khat a ral chhoh meuh chuan English media pawhin Sancho leh United an sawi zawmna ta meuh lo.

Hetihlai hian United elpui Chelsea-in an mit it zawng apiang an hlah lo, tih tur khawpin player langsar Hakim Ziyech, Timo Werner, Ben Chilwell leh Thiago Silva te an la tawh a. Manchester City pawhin Nathan Ake leh Ferran Torres te an lalut tawh.

Ole Gunnar Solskjaer hote chanchinthar neih erawh Harry Maguire-a'n Greece-ah buaina a tawk tih te, Paul Pogba-a'n Covid-19 hri a vei tih te leh Aaron Wan-Bissaka-a quarantine a ngaih avangin pre season tour-ah a tel dawn lo tih te a ni.

Manchester United-in tun nipuiah player lakluh an la nei lo a, season liam taah pathumna ni mah se champion Liverpool leh pahnihna Manchester City te nen an inthlau hle.

Ole Gunnar Solskjaer hote tan dinhmun ngaia ding nawn tur pawhin insiamṭhat an mamawh a, player thar an mamawh. English club hian out and out winger, striker, centre back leh midfielder an mamawh niin a lang.

Tuna United nena sawi zawm Donny van de Beek hi kum 23 mi a ni a, feet ruka sang niin centre midfielder a ni. Dutch midfielder Van de Beek hi 2018/19 season khan attacking midfielder-ah a khel a, amaherawhchu Frenkie de Jong-a'n Barcelona a pan tak avangin season liam ta khan pawh hnun hret niin no. 6 role a chelh.

Van de Beek hi box to box midfielder tiha sawi theih a ni a, ball pass ṭha tak a nih bakah a hawi zau a, season liam ta khan 82% zet a pass dik. Manchester United-in Paul Pogba leh Bruno Fernandes nei tawh mah se Nemanja Matic a upat tawh avangin midfielder ṭha kawppui tur pakhat dang an la mamawhah a ngaih theih.

Brazilian midfielder Fred-a'n season hnih chhungin United ṭantute lawmna a siam thei lo a, Scott McTominay pawh thawkrim ṭhin mah se rinrawla dah turin a la ṭha tawk lo. 

United midifelder neih sa aṭanga thlir chuan Van de Beek hi danglamna thlen thei tur a ni a, chutihrualin Dutch midfielder hi tlarhnung puih kawngah erawh a ṭha ber a ni bik lo.

Donny Van de Beek hian Premier League-a khelh a châk a, English club-in a agent an be tawh. Chutihrualin club hian Ajax hnenah dilna an thlen lo a, Man United-in an dawr dan a pawimawh ber ang.

United leh Van de Beek inkar boruak a ṭha a, Dutch midfielder hian Old Trafford lamin an duhzia pawh a hre tawh. Amaherawhchu Ajax hian euro maktaduai 40 bawr vel an chhiar a, English club hian Dutch club pawisa chhiarna zat hi an ngam a ṭul ang.

Barcelona pawhin Van de Beek hi an ngaihven nia hriat a ni a, Catalan club hian manager atan Dutch manager Ronald Koeman an lakluh avang leh Frenkie de Jong an kawl avangin English club hian elpui an nei dawn. Chutihrualin Lionel Messi chhuah tum boruak avanga buai Barcelona hian kar khat chhung chu Van de Beek chungchangah thawm an nei lo.