Gunners thluak bur Wenger leh a hote

Arsenal hian league nomawi ṭum 13 chawi tawh mah se an champion hnuhnung ber (2003-04) aṭangin kum 15 a liam tawh. Kuminah Arsene Wenger leh a thachhang dawltute hian a chung bera awm chungin season an khar thei ang em tih hi zawhna lian tak pakhat a ni awm e.

Arsenal legend Thierry Henry chuan Sky Sports pundit nih chhunzawm a duh avangin Under 18 assistant coach a nihna bansan mah se team enkawlna kawngah nghawng a nei lian hran lo - Gunners player hlui leh team enkawl lama tawnhriat ngah tawh tak tak an la ther fur.

Arsene Wenger

Premier League manager nilai zinga a dinhmun ngai chelh rei ber ni mek Wenger hian Gunners tana a season 18-na a hmang dawn - Strasbourg University aṭanga Economic subject-a graduate manager hi pa rilru nghet leh luhlul tia sawi ṭhin a ni.

Kum 66-a upa Wenger hian Gunners hi match 1000 a enkawl tling tawh a, tuna a contract neih lai hi a pawtsei lo a nih chuan 2016-17 season zawh rualin a tawp nghal ang. Kuminah hian league emaw Champions League nomawi emaw a chawi pui a nih chuan Gunners fan-ten chelh an duh ngei anga, season liam ta anga an 'nil' leh a nih chuan amah uitu aiin ui lotu an tam tawh zawkin a rinawm.

Steve Bould

Assistant manager Steve Bould hi player a nih lai chuan defender a ni ṭhin, 1986-1995 season inkara Arsenal enkawltu George Graham kaihhruaina hnuaiah Tony Adams, Lee Dixon leh Nigel Winterburn te nen inkhel ho ṭhinin a hun tawp lamah Wenger-a hnuaiah pawh a inkhel hman nghe nghe.

Inkhelh a chawlhsan hnuah academy staff-ah a lut a, kum 2009 khan Youth Cup champion nih puiin kum hnih a zawnin academy league title a lakpui bawk - 2012 aṭanga tun thlengin Wenger-a assistant a nih chhunzawm.

Boro Primorac

First team coach Boro Pri-morac hi mi thunun thei leh hneh thei tak mai a ni. Yugoslavia international defender hlui hi Wenger-a mi rin leh a thurawn lakna ber pakhat a ni hial.

France leh Japan-ah pawh a lo thawhpui tawh Primorac hi Wernger-a'n Arsenal a zawm hnuah pawh a hruai tel zel a, ṭawng hrang pakua ngawt a hman theih avang leh a thluak ṭhat avangin langsar si lo a club tana mi ṭangkai a ni.

Neil Banfield

First team coach pakhat zawk Neil Banfield hi Crystal Palace, Adelaide City leh Leyton Orient tana defender rinawm lo ni tawh ṭhin a ni a, Arsenal-ah a mikhual lo a, academy a enkawl hnuah reserve team enkawl lehin kum 2012 a Bould-a assistant manager a nih khan ani hi first-team coach-ah lut chho vein tunah hian Primorac nen an thawkdun mek.

Andries Jonke

Academy manager An-dries Jonke hian football-ah tawnhriat a ngah tawh. Nether-lands-in 2014 FIFA World Cup semifinal an luh theih nan mi pawimawh niin naupang tuai hriam thiam hmingthang nia sawi ṭhin a ni bawk.

Barcelona leh Bayern Mu-nich-ah Louis van Gaal kaih-hruaina hnuaiah hna a lo thawk tawh a, kum 2014 khan Arsenal zawmin player puitling ni thei tura naupang kaihruai thiam a ni.

Steve Gatting

England cricket captain (1986-1988) hlui Mike Gat-ting-a unaupa Steve Gatting hian player a nih laiin Arsenal tan kum 1970 bawr vel khan match 76 a khel tawh.

Christ's Hospital boarding school, Sussex-ah kum sarih ngawt hna a thawh hnuin kum 2007 khan Arsenal youth coach-ah a ṭang a, tunah hian Under21 head coach a ni mek.

Carl Laraman

Under21 assistant coach Carl Laraman hi Wenger-a thlachhang dawltu zinga a vanglai pawha khelmual chhunga hnuhma nei lo tlemte zinga mi a ni a, Arsenal naupang lam kum bithliah team zawng zawng a enkawl vek tawh - ani aia Arsenal player-te theihna leh thiamna hrechiangtu an tam kher lo ang.

Kwame Ampadu

Arsenal-ah a football nun
ṭanin Kwame Ampadu hian foot-baller ropui nih tumin suang-tuahna nei mah se Gunners-ah kum thum a awm chhungin first team-ah a khel phak lo. A inkhelh laiin match 400 chu khel mah se division hniam lamah a inlan tlangpui.

Kum 2012 a Arsenal a rawn zawm leh chuan player ni loin Under16 coach a ni tawh a, tunah hian Under18 head coach niin Wales Euro 2016 squad kha training a neih pui ve bawk.

Tony Adams

'Mr Arsenal' tia hming lem an vuah hi North London club chi leh kuangte zingah chuan inhmelhriattir hranpa vak a ngai awm lo e. Arsenal captain zinga an ngaih ropui berte zinga mi hian kum 1983-2002 inkar khan a club tan match 504 khelin league title pali bakah FA Cup pathum a lak pui.

Coaching lamah erawh hnuhma a nei ropui lem lo rih hle thung. Inkhelh a chawlhsan hnuah Wycombe a enkawl a, hemi hnuah Portsmouth leh Azerbaijan club Gabala enkawl leh mah se result ṭha a nei hleithei lo.

Kum 2012 khan Arsenal sporting director-ah rawn ṭang let lehin tunah chuan Ampadu kaihhruaina hnuaiah Under18 assistant coach a ni ang.

Jan van Loon

Dutchman Jan van Loon hian tun hmain an ram youth team a enkawl tawh July 2014 khan Andries Jonker leh Frans de Kat te nen Arsenal an zawm. Dutch coach Frans de Kat a chhuah ruala chhuak leh mai tura ngaih ni mah se tun thlengin a cham chhunzawm a - Under16 head coach a ni mek.

Freddie Ljungberg hi pla-yer a nih laiin Gunners fan-te lawmna thlentu a lo ni fo tawh a, Invincibles hun laia mi a nih miau avangin club hmangaihtute thinlungah a tla na hle. Henry ang thoin manager ni tura intuaihriam mek a ni a, Under15 coach a nih bakah club ambassador a ni bawk.