Barca tlarhnung phui nan French player

Barcelona-in Lucas Digne chu Paris Saint-Germain FC aṭangin an lalut a, French left back hian Nou Camp-a kum nga cham turin contract a ziak.

Kum 22-a upa Digne lalut tur hian Catalan club hian PSG hnenah pound maktaduai 13.9 (16.5m euros) an pe phawt a, mimal leh team result a zirin a man hi a la pung chho thei bawk ang. French full back Digne hian Barca-ah hian buyout clause pound maktaduai 51 (60m euros) a neih nghal avangin leichhuah erawh a har ṭalh tawh ang.

Luis Enrique hote hian Digne an lakluh hma hian Euro 2016-a France tlarhnung mawitu Samuel Umtiti chu Lyon aṭangin pound 21 (25m euros) in an lo lalut tawh a, kum 22-a upa central defender Umtiti hian kum nga atan contract ziakin a buyout clause chu pound maktaduai 50 (60m euros) a ni.

Barcelona hian French defen-der pahnih bakah hian Villarreal lama season liam taa an chhuah midfielder Denis Suárez chu lei let theihna an neih avangin July thlatir khan pound maktaduai 2-94-in an la let a. Spanish attacking midfielder hian kum li daih contract a ziak.

Tu nge Digne?

France defender Digne hi July 20 , 1993 khan Meaux, France-ah a piang a, khawvel hriata a rawn larchhuahna chu Ligue 1 club Lille a ni. July 2013 khan PSG-in Digne hi Lille aṭangin euro maktaduai 15 bawr velin an lalut a, Brazilian left back Maxwell tluk loh vangin season hnih chhungin match 27 chiah league-ah a inlan. Nikum khan Roma-ah loan hmanga chhuakin Serie A-ah vawi 33 zet a inlan a, Euro 2016-ah khan France team-ah koh ni mah se coach Didier Deschamps-a'n Patrice Evra chunga rinna a nghah zawk avangin Digne hi a inlan lo.

Kum 22-a upa Digne hian France tan junior level hrang hrangah a inlan kim vek a, 2014 FIFA World Cup-ah khan kum 20 leka upa niin ram tan a lo inlan tawh bawk.

Barca tlarhnung

Luis Enrique-a'n left back-ah Spain rinrawl Jordi Alba a kawl sa a, Valencia aṭanga Catalan club zawmtu Alba hian season liam ta khan inlena hrang hrangah match 45 zet a inlan a, heng zinga vawi 31 hi La Liga a nih bawk avangin Digne tan khelhna hmun chan a harsa khawp ang. Chutihrualin French full back leh Barca khelh dan hi a inrem avangin squad tikimtu satliah erawh a nih hmel loh a, mamawh hun taka chhawr theih tura a awm erawh chuan Catalan club-in an hlawkpui a rinawm.

Euro 2016 hmain Umtiti-a'n France tan a la khel ngai lo a, quaterfinal-a Iceland an sawp
ṭuma a inlan hnuah Deschamps-a'n final thlengin kum 22-a upa Barcelona player thar chungah rinna a nghat. Umtiti elpui tute hi Javier Mascherano leh Gerard Pique te anni dawn a, hmuh ngheh chan nghal huphurhawm deuh mah se Catalan club-ah rinrawl a nih chhoh theih beisei a ni.

Barca hian Juventus-ah Dani Alves an chan a, Aleix Vidal leh Sergi Roberto te an neih tho avangin Enrique-a'n player dang a melh lo a nih pawhin a mak lo ang. Catalan club hian season liam ta khan league-ah goal 29 an chhuah a, nomawi humhim tho mah se treble champion ṭuma an goal chhuah zat aia goal riat laia a tam avangin tlarhnung inremṭhat an mamawh tih phat rual a ni lo.

Besei an phak loh season-ah Barcelona-in La Liga leh Copa del Rey an champion a, season tharah erawh nomawi kawl sa humhim bakah Champions League neih let an tum ang.