Reds tan Grujic-a vul nghal

Liverpool midfielder thar Marko Grujic chuan Reds tana a match hmasa berah goal a khung nghal - Merseyside club hian Nilaini zan khan Fleetwood Town chu pre-season friendly match an khelhpui a, League One club hi 5-0 zetin an sawp.

Reds tan pound mak-taduai 5.1-a Anfield pantu midfielder bakah hian Roberto Firmino chuan goal hnih a khung a, Lucas chuan goal khat dang a khung ve bakah kum 16 leka upa rawlthar duhawm Ben Woodburn chuan goal khat a thawh ve bawk.

Liverpool tan player tharum ngah leh ball thiam Marko Grujic hian goal khat a khung mai bakah hian penalty a hlawh chhuak bawk a, a penalty hlawh chhuah erawh rei tak hliam vanga a chawlh hnua lo kir leh Danny Ings chuan goal-ah a chantir thei lo.

Reds boss Jurgen Klopp chuan Grujic fakin, "A match hmasa berah goal a khung nghal a, a lawmpuiawm takzet a ni. Kum 20 leka upa a la nih avangin hmasawnna tur a la ngah a, a tan chuan vawiin inkhel hi mumang ang mai a ni," tiin a midfielder thar chungchang a sawi.

Tute nge inlan?

Liverpool: (4-2-3-1): Karius (Bogdan 45), Flanagan (Randall 45), Matip (Wisdom 45), Lovren (Ilori 45), Moreno (Smith 45), Stewart (Brannagan 45), Grujic (Leiva 45), Alexander-Arnold (Woodburn 45), Markovic (Ejaria 45), Mane (Kent 45), Ings (Firmino 45).