Football club hlu ber Real Madrid

Forbes magazine-in a tarlan danin Real Madrid chu khawvel football club zinga hlu ber a ni. Spanish club hian he nihna hi kum li chhung a zawnin chelh tawh mah se kuminah erawh NFL club Dallas Cowboys tluk loin infiamna team hlu ber pahnihna an ni thung.

Cristiano Ronaldo khelhna Real hian nikum UEFA Cham-pions League-ah a vawi 11 nan an champion a, an record siam sa khumin an hlutna pawh kum 2015 nena chhut chuan 12% laiin a pung bawk. Spanish club hlutna hi pound tluklehdingawn 3.03 a ni a, kum hmasa lam kha chuan an hlutna hi pound maktaduai 2.76 a ni.

Tun ṭumah erawh American football club Dallas Cowboys an rawn lang hlawl a, kum 2011-a forbes list tichhuah ṭan aṭanga football club ni lo pakhatna ni thei hmasa ber an ni. Tun ṭuma pangana Manchester United hian kum 2011 leh 2012 khan pakhatna dinhmun an lo luah tawh a, hemi hnu hian Real Madrid chu kum thum chhung pakhatna an ni.

Tun ṭumah hian NFL club-te an rawn cheṭha a, infiamna team hlu 50 tarchhuah zinga 27 chu American football team-te an ni. A sang 10 zingah hian American football team pali Cowboys, New England Patriots, Washington Redskins leh New York Giants te an lang a, basketball (NBA) team pahnih New York Knicks leh Los Angeles Lakers te bakah baseball (Major League Baseball) team pakhat New York Yankees te an lang ve bawk.

Football team zinga hlu ber Real Madrid hnuai chiahah hian an elpui Barcelona (£2.69bn) an awm a, Spanish club pahnih baka football club zinga top 10-a lang pha chu Manchester United an ni. Red Devils hian Champions League khel pha lo mah se an hlutna hi nikum aiin 7% in a sang a, Adidas nen pound maktaduai 750-a an inremna an siam vangah a ngaih theih. Chutihrualin United hi top 25 zinga ba ngah ber an ni thung.

English club zinga top 50-a lang phate chu Arsenal (23), Manchester City (28), Chelsea (36) leh Liverpool (41) te an ni.