Leon McKenzie Premier League striker aṭangin boxing khawvelah

Leon McKenzie tih hming pu i hre tawh ngai em? I hre lo a nih pawn football ngainatu i nih chuan Crystal Palace leh Norwich City hming tal hi chu i hre tawh ngei ang - heng English club lar pahnih tana lo khel tawh ṭhin Leon McKenzie chuan November 13 khian English super-middleweight kawnghren Jahmaine Smyle nen London khawpuiah an inchuh dawn!

Kum 38-a upa McKenzie hian kum 2013 khan football a chawlhsan hnuah boxing khawvel a luhchilh a, khingpuite net tawn puar tura ball um ṭhin striker hian tunah chuan a kuttum hmangin khingpuite hmai a zawng ta zawk a, football khelmuala a hlawhtlinna aia nasa zawk mahin boxing ring chhungah hlawhtlinna a chhar hnem.

Hmanah chuan...

Kum 1995 khan Leon McKenzie-a'n Crystal Palace a-
ṭangin a professional career a ṭan a, Eagles (Crystal Palace sawina) tan a season hmasa ber a hman zawh hnuah kum 1997 khan loan-in Fulham a zawm. Fulham-ah a beisei ang hlawhtlinna a chhar loh hnuin kum 1998 khan loan bawkin Peterborough United a zawm.

Peterborough-ah McKenzie-a'n a thiamna tak tak a hai chhuak a, league match 14-ah goal riat khung sakin a hming a chher hle. Kum 2000 khan Posh (Peterborough sawina) hi a nghetin a zawm a, season thum London Road-a hun a hman chhung hian inelna hrang hrangah match 103 khelh sakin goal 49 a khung a, Norwich City-in an hmuh hmaih lo.

December 2003-ah Norwich hi a zawm a, a match hmasa berah an hmelma kumhlun Ipswich Town hmachhawnin goal hnih a khung nghal a, Canaries fan-te thinlung hneh turin hun a duh rei lo hle. Norwich-a a season hmasa berah Premier League khel turin an inpetkai nghal a, Canaries tlarhmaah a hunlaia English striker beiseiawm ber pawl Dean Ashton nen inkawp mah se Premier League-a an season hmasa berah Championship lamah an tla lehnghal.

Norwich-ah season thum hun a hman chhungin league match 79 khelin goal 20 a khung a, kum 2006-ah a nupui nen an inṭhen avanga a buaina avangin Canaries hotute hnenah chhuah a dil a, Coventry City a zawm.

Mangṭha football

Leon McKenzie-a'n Norwich City a chhuahsan hnuah ngai a awh leh tawh lo. Coventry tan season thum a khelh chhungin khup hliam vangin a buai fo a, league match 62 khelin goal 12 chiah a khung a, kum 2009-ah Charlton Athletic a zawm. Charlton-ah kum khat a khelh hnuin chhuah zalen a ni.

Northampton Town leh Ket-tering Town tan khelh chhunzawm leh mah se Peterborough leh Norwich-a a vanglai ang a phak thei tawh lo a, December 2011 khan kum 33 leka upa nichungin inkhelh a chawlhsan thu a puang.

McKenzie-a'n inkhelh a chawlhsan hnuah a tuina lam music a luhchilh tur thu sawi mah se a beisei ang hlawhtlinna a hmu lo a ni mai thei July 2012 khan football-ah a kir leh. Mahse, McKenzie-a'n hman a phak thei tak tak tawh lo a, English sixth division club Corby Town tan season khat a khel hman chauh tihin a ballboot a khai a, a vawi hnih nan football a mangṭha.

Hello boxing!

McKenzie-a'n a vawi hnih nana football a thlah hnuah hawikir a tum tawh lo - an chhungkaw lo lansarh tawh
ṭhinna boxing luhchilh turin thutlukna a siam. McKenzie pa Clinton McKenzie hi British leh European light-welterweight champion lo ni tawh a ni a, a putea Duke McKenzie chu a hunlaia boxer lar a ni bawk.

Duke hi a vanglaiin weight divison pathumah world cham-pion (IBF flyweight, WBO bantamweight, WBO super-bantamweight) a ni a, British leh European flyweight bakah British featherweight-ah a champion bawk. McKenzie-a'n thutlukna a siam sual lo - June 29, 2013 khan ring chhungah a vawi khat nan a hmel a lan a, a chak chiang hle.

York Hall, London khaw-puiah John Mason nen an inhmachhawn a, amah ang thoa British boxer hi round hnihnaah technical knockout-in a hneh a, a hawi kir tawh lo. Kum 35-a upa a nih hnua boxing luhchilh ve chauh a nichungin vawi kua inhnekah vawi riat a chak a, vawi khat a khingpui a inhnehtawkpui. Heng zinga vawi thumah hian a khingpui a knockout.