Klopp-a'n Allen hmalam hun chinfel a duh

Liverpool manager Jurgen Klopp chuan an midfielder dinhmun chiang lo Joe Allen hma-lam hun chu chinfel thuai an duh thu a sawi.

Euro 2016 khelh zawh taka UEFA team of the tournament-a lang phak Allen hian Anfield-a cham turin season khat dang contract a la nei a, Reds-ah hmun pawimawh a chan phak loh avangin chhuak tura sawi reng a ni.

Klopp chuan, "Allen hmalam hun hi chinfel thuai kan tum a, thil chiang erawh a la awm lo. Allen hi player ṭha tak a ni tih phat rual a ni lo a, Euro duhawm tak Welsh player dangte ang thoa hmang zo hlim a ni. Mahse, thutlukna kan siam a ngai a, chumi tur chuan player kan titi pui ang a, engkim chinfel kan tum ang," a ti.

Euro 2016 semifinal-a Wales hruai thlengtu Allen hian kum 2012 khan Swansea City aṭangin Liverpool hi pound maktaduai 15-in a zawm a, January khan Welsh club hian an player hlui hi loan hmanga laklet tumin dawr mah se Liverpool hian an lo hnar tawh.