Skrtel-a'n Fenerbahce a zawm

Liverpool defender Martin Skrtel chuan pound maktaduai 5.5-in Turkish club Fenerbahce a zawm fel ta.

Slovakian defender hian Nilaini khan Ataturk Airport, Istanbul a thleng a, medical test neiin nimin tlai khan inremna an ziak fel.

Kum 32-a upa Skrtel hian Russian club Zenit Saint Petersburg aṭangin kum 2008 khan Anfield a pan a - Reds tan hian match 319 khelin goal 18 a khung a, 2012 League Cup-ah champoin puiin hemi kum hian an Merseyside club player of the year atan thlan a ni nghe nghe.

Skrtel hian Premier League-ah match 242 a khel a, amah aia Reds player zinga league match khel tam chu player panga Jamie Carragher, Steven Gerrard, Sami Hyypia, Pepe Reina leh Robbie Fowler te chiah an awm.

Euro 2016-ah khan Skrtel hi Slovakia captain niin last
16 an inhlangkai a, mahse world champion Germany ngam loin an tla thung.

Liverpool hian central defender Kolo Toure an lo chhuahtir tawh bawk a, Skrtel a chhuah leh takah chuan Mamadou Sakho leh Dejan Lovren te chu Jurgen Klopp-a tan player pawimawh an nih zual ang.