United tan Ibrahimovic inlan dawn rih lo

Manchester United chuan season thar in-buatsaih nan ni riat chhung China-ah hun an hmang dawn a, striker thar Zlatan Ibrahimovic erawh an zinnaah hian an la hruai ve dawn.

Hetihlai hian Wayne Rooney, Chris Smalling leh Marcus Rashford te erawhin China an pan dawn thung. Mahse, United-in July 22 a Borussia Dortmund an hmachhawn hunah leh July 25 a Manchester City an tum hunah England international pathum hi an la inlan loh tur thu manager Jose Mourinho chuan a sawi.

Kum 34-a upa Ibra hi Euro 2016-ah khan Sweden captain niin an ram hi knock out round luhpui zo loin June 22 khan an tla. July 2 khan free transfer-a United zawmin July 30 a Galatasaray nen friendly match an khelh hunah emaw August 3 a Everton nen an inkhelh hunah a club thar tana a match hmasa ber a khel ve chauh ang. FIFA dan leh hraiah chuan ''Player-in tournament a khelh zawh aṭanga kar thum tal chawlh a nei tur a ni" tih a ni.

Tun nipui chhunga United player lakluh thar dang Eric Bailly leh Henrikh Mkhitaryan te chuan training an zawm tawh a, an club thar tana an match hmasa ber an khel thuai tura ngaih a ni.

Shaw a dam

Manchester United defender Luke Shaw chu Inrinnia Wigan Athletic nen friendly match an khelh huna a inlan theih beisei a ni a, he inkhel hi Jose Mourinho hnuaia Red Devils match hmasa ber a ni ang.

England full back Shaw hi nikum September 15-a PSV Eindhoven nen Champions League group stage-a an intawn ṭumin a ngal ruh pahnih chu tlawh tliah a ni a, hei vang hian Euro 2016 thlengin a inlan thei lo. Season tawp lam khan kum 21-a upa Shaw hian training a zawm leh tawh a, tunah chuan inkhel turin a dam ṭha leh tawh.