Guardiola hnuaia khel tur Sane leh Stones?

Manchester City-in manager thar Pep Guardiola hnuaiah Ilkay Gundogan (Borussia Dortmund), Nolito (Celta Vigo), Oleksandr Zinchenko (Ufa) leh Aaron Mooy (Melbourne City FC) te an lalut tawh a, Schalke winger duhawm Leroy Sane leh Everton defender John Stones te'n Citzens hi an zawm leh hmel bawk.

Sane a chiang?

Germany chanchinbu Bild-in an tarlan danah chuan Leroy Sane-a manah City leh Schalke chu pound maktaduai 42-50 inkar bawr velin an inrem tawh tiin an ziak a, German winger hian Eithad Stadium-a kum li chhung cham a remtih thu an tarlang bawk.

Amaherawhchu, engmah thu-chiang a la awm a, he thu i chhiar meuh chuan a chiang thei tawh bawk. Schalke sporting director Christian Heidel chuan Sane hi euro maktaduai 50 (£41.72m) aia tlawmin chhuahtir a tum lo a, English club ngamna zat hian a khum tak si avangin buaina tur a awm tawh loah a ngaih theih.

Euro 2016-ah khan Germany squad-ah Sane hi a tel a, semifinal-a France an hneh loh ṭum khan second half-ah a rawn inlan. Season liam ta khan Sane hian Schalke tan Bundesliga-ah match 33 inlanin goal riat a khung.

Stones a to dawn

Everton-in an defender John Stones chu Chelsea (£40m in an beisei) lakah hum thei mah se City lakah erawh an chelh zo dawn lo niin lang. Toffees hian kum 22-a upa Stones-a manah hian pound maktaduai 50 tal an chhiar a, England tana khelhna hmun nghet chang thei lo tan a man hi a tam lutuk hret niin lang a, amaherawhchu City hian an sum phut zat hi an theh chhuah a rinawm tawh zawk.

Stones hian Everton chhuah-san a duh a, City pan hi a duh ang chiahin an sum ngamna zat hi Toffees tan hnar phal chi a ni lo ang. Guardiola hian Italy defender Leonardo Bonucci a duh niin sawi a awm bawk a, Juventus phut zat a tam deuh avangin hei erawh a hlawhtlin a rinawm loh.