Klopp-a hnuaiah Liverpool eng nge an an zel dawn?

Jurgen Klopp-a'n October, 2015 khan Liverpool zawm ve chauh mah se Reds neitute mit a tlung tawk a, khawdang a hawi hmain July 8 khan kum ruk dang cham turin contract thar an ziahpui a, khawvela manager hlawh hnem ber pawl ni turin a hlawh an pun sak bawk.

Liverpool-in German mana-ger an ring tawk tih a chiang a, ropuina rama Borussia Dort-mund lo hruai thleng tawhtu coach hi Anfield-a nomawi tam tak hawn turin an beisei - Klopp-a'n a vawi khat nan season tluanin Reds a kaihruai dawn a, player a lakluh rualin a mamawh loh a thianfai.

Kum 49-a upa manager hian nipui transfer bazar inhawng mekah player pathum a lalut tawh a, a sum sen zat hi pound maktaduai 38.7 a ni. Klopp-a'n a player mamawh loh nia a hriat pakua a chhuahtir tawh a, heng aṭanga a sum hmuh belhkhawm chu pound maktaduai 27 a ni.

Tlarhmaah player thar

Tun nipui transfer bazar-a thawm nei lian ber pawla chhal ngam chu Sadio Mane a ni. Reds-in Southampton winger hi African player zinga manto ber ni turin pound maktaduai 34-in an lalut a, kum nga chhung atan contract an ziahpui.

Liverpool-in Manchester City laka Raheem Sterling an chan hnuah amah thlak zo tur an la nei lo a, Klopp hian English winger aiawh turin season hman zawh taka goal 15 khungtu hi a lalut niin a ngaih theih. Saints tana player hlauhawm hi Reds tan vul zo tak ang maw? A hriat thuai dawn e.

Si ban nghaktu

Reds-in Premier League no-mawi chawi an tum a nih chuan Simon Mignolet-a innghah chhunzawm zel chi a ni kher lo ang - Belgium keeper nena inel turin Klopp-a'n Mainz kee-per Loris Karius chu pound maktaduai 4.7-in a lalut.

Kum 23-a upa keeper hian season hman zawh takah Bundesliga match zawng zawng khel kim vekin penalty vawi hnih a dang a, match 34-a inlanah match kua chu goal a chhuah lo. Keeper huaisen leh naupang hi Reds mamawh chhanna a nih leh nih loh a hriat thuai dawn.

Skrtel aiah Matip

Liverpool-in hun rei tak chhung an defender pawimawh lo ni tawh Martin Skrtel chu Fenerbahce lamah pound mak-taduai 5-in an chhuahtir a, veteran defender Kolo Toure chu a contract zawh vangin a thlawnin an chhuahtir bawk.

Reds-in defence laia khel turin Dejan Lovren leh Mama-dou Sakho an nei sa a, defender pahnih inelpui tur hian Schalke 04 defender Joel Matip chu a thlawnin an lalut. Kum 24-a upa defender hian season hman zawh takah khan Bundesliga match khel kim vekin vawi 34 a inlan a, goal thum a khung.

Cameroon international hi kum lamah la nau viau mah se khelmual chhunga tawnhriat neih ngah lamah erawh nau en chi a ni lo. Ram tan vawi 27 inlan tawhin Schalke-ah season sarih chhung hun a hmang tawh a, German club hi a career
ṭanna niin vawi 259 a inlanah goal 23 a khung sak.

Rawlthar duhawm Grujic

Liverpool-in midfield lai-a khel turin captain Jordan Henderson, Lucas leh Emre Can te an nei a, Klopp-a'n player dang mamawh belha a la inhriat miau avangin pound maktaduai 5.1 man Marko Grujic chu January khan Red Star Belgrade aṭangin a lalut a, Serbian club-ah hian loan-in let tir lehnghal mah se tunah chuan Anfield club a zawm tawh.

Serbian rawlthar hi a tharum ngah leh ball thiam vanga lar a ni a, Liverpool tan a match hmasa berah goal a khung nghal bakah man of the match-a thlan a ni a, Reds midfield-ah inelna duhawm tak a hrin chhuah theih rin a ni.

Euro 2016 team of the tour--nament-a lang phak Joe Allen dinhmun a la chiang lo a, season ṭan hmaa club dang nei tur nia sawi Wales mid-fielder hi beisei loh taka a cham chhunzawm a nih chuan Reds midfield laiah Klopp-a'n duhthlan tur a ngah sawt ang.

Reds hmabak

September 1-ah nipui trans-fer bazar khar a ni dawn chauh a, Jurgen Klopp-a'n a mamawh lai thuam ṭha turin hun a la ngah tawk. Player pathum a lakluh tawh bakah loan hmanga chhuak player langsar zingah winger Lazar Markovic leh Marko Grujic-te chu loan an hmanna club aṭangin Anfield-ah an kir leh tawh.

Player chhuah zalen zingah Jose Enrique, Kolo Toure leh rawlthar striker Samed Yesil-te chu a thlawna chhuahtir an ni. Rawlthar player zingah Jordan Rossiter (Rangers, £250,000) leh Joao Carlos Teixeira (Porto, £250,000) te chu man tlawm zawka chhuahtir an ni a, pound maktaduai 4 man Jerome Sinclair (Watford) leh pound maktaduai 2.5 man Sergi Canos (Norwich City) te an chhuak bawk.

Reds player chhuak zingah Jordon Ibe chu manto ber a ni a, rawlthar winger hian Bour-nemouth chanchina an pla-yer manto ber ni turin Premier League club hi pound maktaduai 15-in a zawm a, kum li chhung cham turin contract a ziak.

Engtin zel?

Jurgen Klopp-a'n Milan-a loan hmanga hun a hman hnua Anfield-a kir leh tawh Mario Balotelli chu club dang zawng turin a hrilh tawh a, midfielder Joe Allen hmalam hun chu chinfel thuai a nih tur thu a sawi bawk.

Christian Benteke chu Crys-tal Palace nen sawizawm mek an ni a, West Ham United chuan Belgian striker hi an duh nia sawi a ni bawk. Aston Villa aṭanga Liverpool pound maktaduai 32.5-a zawmtu striker hi Palace chuan an club chanchina player manto ber ni turin pound maktaduai 31.5-in an ngam nia sawi a ni a, thuchiang erawh a la awm lo.

Liverpool-in player lakluh an tum zingah pound maktaduai 11.7-a Udinese midfielder Piotr Zielinski lakluh an tumna chu Serie A club hian an hnar a, Poland international hmalam hun hi a la chiang lo.

Tun hnaia Reds nena sawi-zawm zingah Paris Saint-Ger-main winger Lucas Moura leh Germany international Jonas Hector te hming lamrik a ni bawk a, FC Koln lef-back hi Reds tan mamawh chhanna a ni thei ang.