West Ham Dimitri Payeta an chhuah tir dawn lo

Tun hnaia West Ham chhuahsan tur anga an sawi Dimitri Payet chuan Hammers-ah a hlim thu a sawi a, '100%-in ka chhuak dawn lo tih hi ka chiang a ni" a ti.

Kum 29-a upa midfielder hian Premier League-a a season hmasa berah season duhawm tak a hmang a, inelna hrang hrangah match 38 inlana goal 12 khungin a ṭhiante thun tur vawi 15 a siamsak a, Euro khelh zawh takah statistics hmanga player ṭha ber thlanna barometer-ah pakhatna a ni bawk.

Real Madrid nen pawha sawizawm hlawh midfielder chuan, "Club langsar tak takin min lak-luh an duh tih ka hria a, ka lawm takzet a ni. Mahse, West Ham hi ka hmangaih a, he club hi nuam ka ti takzet bawk. Chutih rual chuan stadium thar Olympic Stadium-a khelh hlan ka nghakhlel em em bawk a ni," a ti.

France international chuan sawi chhunzawmin, "West Ham-ah hian 100%-in ka cham dawn tih ka chiang a, he club hi ka hmangaih em avangin ka chhuahsan dawn lo tih hi Hammers fan-te hnenah ka tiam duh a ni," tiin Premier League club chu chhuahsan tumna a nei lo.

Payet hian nikum nipui bazar lai khan West Ham hi Marseille aṭangin pound maktaduai 10.7-in a zawm a, kum nga chhung atana contract ziak-in a ṭul dan a zira kum khat dang pawhsei theih tura tih a ni. Beisei phak baka a chet ṭhat chhunzawm avangin kum--in February khan Hammers tan kum nga leh a chanve cham turin contract thar a ziak a, kar khatah £125,000 a hlawh mek.