Barca-in keeper chhuah dawn lo

Barcelona sporting director Robert Fernandez chuan Chilean keeper Claudio Bravo leh German keeper Marc-Andre ter Stegen te chhuahtir an tum loh thu a sawi.

Fernandez chuan, "Tun nipui laia kan keeper pahnih an chhuah loh nan theihtawp ka chhuah ang. Kan thusawina ngaiah kan ding reng a, keeper pahnih hi kan chhawr chhunzawm zel ang. Thuthang tam tak a leng a, thuchiang erawh goalkeeper pahnih hi kan hnuaia contract nei an ni," tiin chhuahtir an tum loh thu a sawi.

Catalan club hian an player hlui midfielder Denis Suarez an lalet a, French defender pahnih Samuel Umtiti leh Lucas Digne te an lakluh bakah Neymar contract an pawtsei tawh bawk.

Manchester City manager thar Pep Guardiola chuan kum 24-a upa Marc-Andre ter Stegen a duh niin sawi a awm a, kum 33-a upa Claudio Bravo erawh a man an chhiar zat nen an ngam lo niin sawi a awm thung.

Barcelona sporting director hian keeper pahnih hi chhuahtir tum lo mah se club chhung buaina erawh a la reh lo. Season hnih chhungin Chilean keeper hi La Liga-ah chhawr a ni a, German keeper hi knockout football-ah chhawr a ni. Keeper pahnih hian Catalan club-ah an duh ang zat match an khel thei lo ve ve a, hetihlai hian Spanish media lam chuan season thar
aṭangin Ter Stegen chu rinrawl a nih tur thu an ziak ve bawk.