Leicester-ah Mahrez a cham dawn

Season hman zawh takah beisei loh takin Premier League-ah Leicester City an champion a, chumiin a nghawng tel nghal chu transfer bazar a ni.

Foxes hian an league nomawi chawi-na kawnga player pawimawh Jamie Vardy an chelh tawh a, English striker hi Arsenal lamin lakluh tum-in dawr mah se Foxes tana khelh chhunzawm zel a thlang.

Leicester fan-ten chanchin lawmawm dang hriat tur an neih belh a, chu chu an winger Riyad Mahrez cham tur thu hi a ni. Leicester City manager Claudio Ranieri chuan a player pawimawh hi an hnena a cham chhunzawm zel tur thu a sawi.

Ranieri a inringtawk

Italian manager Ranieri chuan, "Mahrez hi kan hnenah a cham chhun-zawm zel dawn tihah hian ka chiang a ni. He hmun hi nuam a ti a, hlim takin a nui bawk bawk a ni. Mah-rez hi manager hnena 'ka chhuak duh a ni' tia sawi chi a ni lo. He hmunah hian a hlim a ni," tiin a player chu a chhuah a ring lo.

Algeria international hian season hman zawh takah khan Foxes tan league match 37 khelin goal 17 a khung a, PFA Players' Player of the Year-ah thlan a ni. Kum 26-a upa winger hi season duhawm tak a hman avangin Barcelona leh Arsenal nen sawi zawm ni mah se Ranieri ṭawngkam aṭang chuan a chhuah loh hmel hle - hei erawh hriat reng a ṭha, transfer bazar-ah beisei loh thil a thleng fo tih hi.

Kante hmalam hun

Ranieri-a'n Mahrez-a hmalam hun huai takin sawi mah se Chelsea nena sawi zawm hlawh mek N'Golo Kante dinhmunah erawh Italian manager hi huaisen takin a ṭawng ngam lo.

Chelsea boss hlui Ranieri chuan, "Kante hi Euro hma khan contract thar kan zawrh tawh a, tunah erawh kan midfielder lakluh duh hi club tam tak an awm tawh a, engkim hi ama kuta awm a ni," tiin an midfielder chungchangah thuneihna an neih loh thu a sawi.

Khawthlang media ṭhenkhat chuan Kante hi Chelsea chuan pound mak-taduai 27-a lakluh tumin an dawr tawh nia sawi a ni a, tun thlenga contract a la ziah loh danah Foxes midfielder hi a inngaihtuah buai mek niin a lang.

Nomawi humhim turin

Football chanchina thil ropui ber pawl thlen tira, relegate tura rinkai champion puitu Ranieri chuan Premier League nomawi an kawl mek chu humhim tura theihtawp an chhuah tur thu a sawi nghal bawk.

Kum 64-a upa manager chuan, "Premier League nomawi chawi leh hi thil theih a ni lo. Mahse, season hmasa khan thil theih loh chu a tih theih a ni tih kan pholang a ni," tiin mipui beisei loh thil thlen nawntir theih a nih thu a sawi.

Ranieri chuan sawi chhunzawmin, "Pressure kan nei lo a, keini hi champion team chu kan ni. Season hmasa ang kha a ni tawh dawn lo tih kan hria a, mah se indona hmachhawn turin kan inpeih tawh a ni," tiin a zam lo.