Arteta-a Arsenal kutah Community Shield

Pierre-Emerick Aubameyang-a'n goal ropui hmangin Wembley Stadium boruak a chhem alh a, Arsenal captain hian penalty hnuhnung ber chhuih lutin a club chu a vawi 16 nan Community Shield a lakpui.

Premier League champion Liverpool leh FA Cup champion Arsenal te hun pangngaiah 1-1 in an inhnehtawk, hun tawp dawna penalty chhuih tura dah luh Reds striker Rhian Brewster-a'n a hlah avangin Gunners lamin 5-4 in hnehna an chang.

Mikel Arteta nauten FA Cup an chawi aṭanga ni 28 chauh a liam hnuah trophy an hlawh chhuak leh ta. Jurgen Klopp erawh season hmasa lama Manchester City an ngam loh ang bawkin penalty-ah a vanduai zawk an ni.

Aubameyang chu Manchester City leh Chelsea laka goal mawi a khungna Wembley Stadium-ah a tlangnel chhunzawm. Minute 12-naah mual sir lama a ball dawn chu rang taka insiam remin a pet thut a, keeper man to Alisson tan dan phak a ni lo.

Goal luh dawna Arsenal ball inpe kual a hnuhnawm, anmahni box chhungah Liverpool player pali awm chungin ball an inpe kual ngam a, remchang an hmuh hmasak berah nawr let thutin Bukayo Saka-a'n hla taka awm Auba a pe fuh a, Gabonese striker hian chiang zetin a khung. Gunners goal-ah hian keeper Emiliano Martinez aṭanga inṭanin Auba-a'n a tawp a khar a, Liverpool player-in ball an khawih lo.

Gunners lamin goal hnihna khung theihna hun ṭha an nei a, rawlthar Saka siamsak chang fuhtu Eddie Nketiah-a'n Brazilian keeper Alisson a paltlang zo lo, bench aṭanga rawn lut Joe Willock-a'n 1-1 a nih hnuah tauh luh theihna hun ṭha nei mah se goal pawnah a chhuak bawk.

Jurgen Klopp-a'n a player ṭha zingah Trent Alexander-Arnold leh Jordan Henderson te a chhawr thei lo a, a bak chu an kim. Andy Robertson leh Sadio Mane te inthlawp fuh viau mah se an vanneih ni a ni lo, Senegal forward hian hun ṭha nei mah se keeper Emiliano Martinez a rawn tlan hma hman avangin a dansak.

Defender Virgil van Dijk-a goal khung chu offside vanga pawm a ni lo, substitute Takumi Minamino-a'n buai deuh nuaih kar aṭangin an si phurh sut thung - goal luh danah Mohamed Salah a handball niin an ngai, VAR hmanga endik a nih hnuah erawh Salah ban a tawk lo tih a lang.

Georginio Wijnaldum leh Fabinho ten nidang angin ball an inpe fuh hleithei lo a, season hmasa City laka penalty hlahtu Wijnaldum hi minute 90+2-ah lakchhuah a ni. Mahse penalty pet tura lut kum 20 mi Brewster-a'n a hlah avangin an chak lo.

Arsenal coach Mikel Arteta chuan, "Team ṭha leh khawng Liverpool laka ka naute khelh dan khan min ti lawmin ka lung a awi takzet. Ball kan chan loh lai pawhin hmun ruak hnawhkhah tumin kan thawkrim vek a, rilru put hmang a dik hi chuan kawng a inhawng ṭhin," a ti.

Liverpool manager Jurgen Klopp chuan, "Si phurh sut bakah goal dang khung belh kha kan phu. Mahse goal venhim hna thawk ngawrh kan hmachhawn a nih chuan hun ṭha insiam chawp thiam a ngai, khel ṭha viau mah ila tun ṭum atan chuan a tawk zo lo," a ti.

German manager hian season thar a thlir zui a, Premier League club-ten match khata substitution panga siam theih chu hman chhunzawm a duh thu a sawi. Covid-19 vangin substitution pathum ni ṭhin chu pangaah tih pun a ni a, mah se club lamin an vote angin kalphung pangngaiin an kal leh ang.

•    Arsenal-in a vawi 16 nan Community Shield an la, tun hnai season hnuhnung pasarih aṭangin vawi li an la thei. An chungah hian vawi 21 la tawh Manchester United chiah an awm.

•    Liverpool hi season hnih chhung a zawna Community Shield-a chak lo hmasa ber an ni.

•    Arsenal hian FA Cup champion ni chungin Community Shield vawi sarih an la tawh a, FA Cup champion ni chunga shield la hnem ber an ni.

•    Gunners-in inelna hrang hranga penalty shootout an hmachawn hnuhnung 11-ah vawi kua hnehna an chang thei. Liverpool erawh penalty shootout an hmachhawn hnuhnung pangaah vawi thum an chak lo.

•    Season hmasa inelna hrang hrang chhutin Bukayo Saka-a'n assist vawi 13 a nei a, Premier League khel player zinga a tluk loh chu Kevin De Bruyne (22) leh Trent Alexander-Arnold (15) te chauh an ni.

•    Liverpool player zingah Minamino kha Wembley-a a inlan hmasak bera goal khung nghal thei hmasa ber a ni.