Auba a cham dawn

Arsenal manager Mikel Arteta chuan an captain Pierre-Emerick Aubameyang chu an chelh ngei a rin thu a sawi a, contract thar ziak turin an hmin tawh niah a ngai.

Aubameyang-a contract neih lai hi season thar lo awm tur daih chauh hi a ni tawh, a pawtsei lo a nih chuan nakkum nipui bazarah man nei loin a duh lam a pan thei dawn. Club leh player hian indawrna an nei mek a, manager Arteta chuan an inrem thei ngei a ring.

Arteta chuan, "Aubameyang chelh hi ka hna pawimawh a ni, indawrna kal mek hi hun rei vak loah a fel theih ka beisei," a ti. Auba pawhin Arsenal player nih nuam a tih thu leh a hlim thu a lo sawi ve bawk.

Aubameyang hian 2018 January thla khan Borussia Dortmund aṭangin Arsenal hi pound maktaduai 56-in a zawm a, match 109 a khelh aṭangin goal 70 a khungsak tawh. Wembley Stadium bikah phei chuan Alexis Sanchez hnung zuiin Gunners player zinga goal nga khung thei hmasa a ni.

Mimal chawimawina hrang hrang dawng tawh mah se nomawi lian chawi chu a duh ber a ni. Gunners tan Europa League leh League Cup final a khelhah an chak lo a, kuminah erawh FA Cup chawiin  Community Shied-in a zui nghal bawk. Arteta kaihhruaina hnuaiah Gunners an indinthar mek a, an captain hian dinhmun pawimawh tak a chelh. Player ṭha dang lakluh tur zawnga buai ai chuan an neih sa, insiamrem chawp ngai loa ṭhasa Auba chelh hi an tan hna pawimawh a ni.