Team vanduai South Africa
Cricket World Cup khelh a nih dawn apiangin champion tura rinkai zingah an tel ziah a, final tak ngial pawh an la khel si lo. cricket thiam ram tiin khawvelin a hria a, champion tura rinkai zinga an tel ziah hi a mak lo a, an la champion miah lo hi a mak zawk.
Kumin World Cup-ah beiseina sang tak nen bul an ṭan a, captain AB de Villiers ho na hnuaiah cricket khawvela hming langsar ṭhiau Hashim Amla, Faf du Plessis, Dale Steyn leh Imran Tahir te an khelh dawn avangin mipui beiseina hi a awm lo hran lo. Mahse, an beiseina erawh a thamral a, an vawi khat final luh tumna chu New Zealand-in an khawtualah ngei lo tihtawp sakin semifinal-ah an tla.
South Africa player-te'n chak phu tak chunga an chak loh tuar thiam loin ṭap chungin khelmual an chhuahsan a, an fan-te an vel ṭap.
Semi-final zinkawng
South Africa-in beiseina sang tak nen World Cup bul an ṭan a, an match hmasa berah Zimbabwe chu run 62-in an hneh nghal. An match hnihnaah erawh South Africa-in beisei an phak lo. Melbourne Cricket Ground-a mipui 87,000 hmaah World Cup-a an chakloh chian ber ṭum South Africa-in an tawng a, run 130 tehmeuhin India an hneh lo. South Africa an harh zawk a, an match thumnaah West Indies chu run 257 zetin an sawp a, run 201-in Ireland an sawp chhunzawm.
An match nga naah South Africa an chesual leh a, ruah surin inkhel a tihbuai vang a ni pakhat. DL method hman niin an khingpui Pakistan lakah run 29 lekin an tlawm a, khawvelin a beisei loh result a hmu. An match ruknaah erawh South Africa-in awlsam takin UAE an hneh a, quarterfinal an lut. Quarter final-ah South Africa-in harsatna an tawk lo, awlsam takin Sri Lanka an hneh a, wikcet kua zeta chakin semi-final an lut chiang hle.
Zinkawng tawp dan lungchhiatthlak
South Africa leh New Zeland te'n Thawhlehni zing khan ICC World Cup semi-final match hmasa zawk an khel a, final la lut ngai lo pahnih hian final luh tumin an ṭang hle.
South Africa an bat hmasa a, an khel ṭha hle. Captain AB de Villiers chuan ball 45 lek a hmachhawnah run 65 avawchhuak tawh a, century siam tur khawpin a dinhmun a ṭha. Mahse, hei hi a thleng - ruah a sur! Ruah sur vangin inkhel pangngaia over 50 ṭhin kha over 43-ah tihniam a ni a, South Africa an vanduai.
New Zealand-in chak nan run 5 chiah an mamawh tawh tihin ball hnih chiah an nei tawh a, Kiwis leh SA fan-te thin a phu dup dup. Ball tawp ber tur dawttu chu run 84 zet vawchhuaktu Grant Elliot chuan lo hmachhawnin six run a hlapchhuak a, New Zeland fan-te an khawtualah an sapatal a, South Africa mipui an ṭap thung.
Semi final ngeih lo South Africa!
World Cup semifinal-ah South Africa vawi li an tlakna a ni ta a, an tlak dan erawh an vanduai thei hle. Kum 1992 khan South Africa-in World Cup-a an semi final match hmasa ber an khel a, ruah surin a tihbuai vang bawkin an lo vanduai tawh a, DL method hman niin England lakah an tlawm.
Kum 2009 khan South Africa-in semifinal an lut leh a, Australia hneh loin final an lut zo lo. An chak loh dan erawh an vanduai a, ball liah run khat chiah chak turin an mamawh tawh tihin Allan Donald a run out a, wicket bang an nei tawh si lo, team pahnih an inhnehtawk. Mahse, group stage-a khel ṭha zawk Australia an tlang daih.
Kum 2003 khan South Africa-in semi-final an lut leh a, hemi ṭum erawh vanduai vang ni loin Australia an ngam lo a, an tlawm.
Mittui ko chhuaktu De Villiers mittui
South Africa-in a vawi li nan semi-final ah chak hmel an hmu zo lo a, an chak loh danah an khelh ṭhat loh vang ni miah lo a ni bawk si. Khelmualah South African player-te an ṭap a, captain ngawichawi leh ze cool De Villiers meuh pawh a insum zo lo a, mittui nen khelmual a chhuahsan.
Cricketer ropui an sawi apianga an sawi tel ziah tawh tur De Villiers chuan, "Game ropui tak a ni. A chak lo zawka kan ṭang ta mai hi a na kan tiin tawrh thiam har kan ti a, kan rilru na te dam tur chuan hun engemaw chen kan mamawh dawn a ni," a ti.
De Villiers chuan mittui nen sawi chhunzawmin, "Engdang nge beisei tur kan neih chuan? Kan theihna zawng zawng pein kan khel a, kan chak zo ta chuang si lo. Hnehna ropui tak nen haw ila, kan ram mipui te thinlung ti lawm ila ka duh. Chutiang tih theihna hun ṭha chu pek kan ni a, kan hmang ṭangkai thei si lo. Mipui tam takin min ṭan a, trophy hawn ngei kan duh hle. Mahse, hei hi a tawpna a ni lo a, naktukah mawi takin zing ni eng a lo chhuak leh dawn a ni," tiin hun ṭha dang an la neih leh tur thu a sawi fan.
De Villiers-a ṭap a, South Africa fan-te mittui pawh a hul bik chuang lo.