F1 season ṭan chauh mah se boruak a sang nghal

Kar hmasa khan tun season-a a vawi khat nan Australian Grand Prix an tlan a, tunkar tawp hian Malaysian Grand Prix an tlan leh ang.

Intlansiak hmasa berah khan Mercedes driver pahnih Lewis Hamilton leh Nico Rosberg te an tlan ṭha hle a, British driver Hamilton chu pakhatna a ni a, a teammate German driver Rosberg chu pahnih­na a ni. Rosberg hian kuminah champion a tum a nih chuan Malaysia-ah hian Hamilton-a hma a tlan a tum ruh hle ang. Hamilton hian a lallukhum humhim a tuma nih chuan a teammate hnunga thlen hi a duh bik lo ang. Dri­ver pahnih inum tur hi khawvel nghahhlelh a ni.

Team thuhmun ni mah se mimal hmingṭhat duhna khawvel a nih avangin driver pahnih te hi inelna vawi hnihna tlan hma hauhin an inel nghal tawh hle a ni. Australia-ah khan qualifying leh intlansiak takah Rosberg hi a tlan ṭha em em a, mahse ani aia tlan ṭha pakhat chu Hamilton a ni.

Malaysia intlansiak kawng hi hmun danga kawng te aiin a danglam deuh bik a, hmun ṭhenkhat laiah chak tak tak a tlan theih a nih laiin hmun ṭhenkhatah chuan zawi muang deuha tlan a ngai thung. Kawng ngil sei thui tak a awm bawk avangin intlansiak a hmuh­nawm ṭhin a, tun kar­tawp intlansiak pawh hi khawvelin a en châk tawh hle. Chanchin ngaihnawm dang pakhat chu Mc Laren driver Fernando Alonso-a'n intlansiak car a khalh theih an beisei hi a ni.